فصیح الدین فطرت: د هېواد پولې خوندي او د «اسلامي امارت» تر څار لاندې دي
د طالبانو تر کنټرول لاندې باختر اژانس راپور ورکړی، چې د طالب چارواکو یو پلاوي د بدخشان اشکاشم ولسوالۍ ته په خپل یوه سفر کې له پولو لیدنه کړې ده.
د راپور له مخې، دغه سفر کې د طالبانو د اطلاعاتو او کلتور وزارت سرپرست ملا خيرالله خیرخواه، د دغه وزارت نشراتي معین مهاجر فراهي او لوی درستیز قاري فصيح الدین فطرت د اشکاشم بندر ته هم سفر وکړ.
د باختر اژانس د راپور له مخې، د طالبانو لوی درستېز قاري فصيح الدين فطرت په دغه سفر کې د ملګرو ملتونو هغه ادعاوې رد کړې چې ګڼې د افغانستان سرحدونه خوندي نه دي.
هغه زیاته کړه:« د هېواد پولې خوندي او د تر اسلامي امارت تر کلک څار لاندې دي.»
په همدې حال کې، تاجکستان په وار، وار ویلي، چې د افغانستان سره په پوله کې له دغه هېواده وراوښتي ترهګر یې وژلي.
تېرکال تاجکستان ویلي و، چې ځواکونه یې په پوله کې د تیارسی په حال کې دي.
د روان کال په مې میاشت کې د روسیې په مشرۍ د ګډ امنیتي تړون په نامه یوه سیمهییز سازمان خبرداری ورکړی و، چې (داعش) ډلې د افغانستان په شمال کې د تاجکستان پولې ته څېرمه خپل څلور زره وسلهوال ځای پر ځای کړي دي.