د طالبانو د صنعت او سوداګرۍ وزارت وايي، تېر کال یې افغانستان ته د څه باندې ۸ مېلیارډه ډالرو په ارزښت واردات کړي او ۱.۸ مېلیارډه ډالرو په ارزښت یې هم له افغانستانه توکي صادر کړي دي.
یاد وزارت دغه معلومات د رسنیو په مرکز کې د خپل کلني راپور پر مهال شریک کړل.
د طالبانو د صنعت او سوداګرۍ وزارت وايي، په تېر کال کې یې د لس مېلیارډه ډالرو په اندازه سوداګري کړې وه.
د طالبانو د صنعت او سوداګرۍ وزارت مرستیال احمدالله ذاهد د یاد وزارت د کلني راپور د معلوماتو د شریکولو پر مهال د چهار شنبې په ورځ د (زمري ۱۰مه) د رسنیو په مرکز کې وویل، چې تېر کال کې یې څه باندې ۸ مېلیارډه ډالرو په اندازه افغانستان ته واردات لاره او ۱۰.۸ مېلیارډه ډالرو په اندازه یې هم له افغانستان څخه صادرات کړي دي.
دغه وزارت وايي، په وروستي یوه کال کې روسیې ته د افغانستان د صادراتو کچه ۵۴، ترکیې ته ۵۳، ایران ته ۱۹، چین ته ۱۶ او قزاقستان ته ۲،۵ سلنه زیاته شوې ده.
د طالبانو دغه وزارت پر داسې مهال د سوداګرۍ په برخه کې د لاسته راوړنو ادعا کوي، چې لا هم د پاکستان او نورو ګاونډیو هېوادونو سره ډېری وخت افغان سوداګر د ستونزو په اړه شکایتونه کوي.
د طالبانو د صنعت او سوداګرۍ وزارت مرستیال دا رنګه وویل، په تېر کال کې د منځنیو او کوچنیو کاروبارونو د ملاتړ او پیاوړتیا له لارې، ۶۴۶۰۱۵ تنو ته په مستقیم او شاوخوا ۴۴۱۸۵۷۰ تنو ته په غیر مستقیم ډول کاري فرصتونه رامنځته شوي دي.
که څه هم دغه وزارت په تېر یوه کال کې سلګونه زره کسانو ته په مستقیم او غیر مستقیم ډول د کاري فرصتونو د برابرولو ادعا کوي؛ خو لیدل کېږي چې هره ورځ لسګونه ځوانان د کاري فرصتونو د نشتوالي له امله په نا قانونه او قاچاقي لارو بهرنیو هېوادونو ته د کار کولو په موخه سفرونو کوي.
