د صلاحالدین رباني په مشرۍ د افغانستان اسلامي جمعیت ګوند هیله څرګنده کړې، چې مرستندویه ادارې د هېواد په شمالي ولایتونو کې د یکشنبې په شپه د شوې زلزلې له اغېزمنو خلکو سره بېړنۍ مرستې ترسره کړي.
یاد ګوند د دوشنبې په ورځ (د لړم ۱۲مه) په خپله اېکسپاڼه کې د یادې پېښې له امله خواشیني څرګنده کړې او ویلي یې دي، چې افغانستان د زلزلو د رامنځته کېدو د سیمو په امتداد کې موقعیت لري، چې له همدې امله ډېر ځله د دې ډول پېښو شاهد وي. د اسلامي جمعیت ګوند په خبره، دا موضوع د بېړنیو حالتونو د سم مدیریت او د ورته پېښو د مخنیوي لپاره جدي پاملرنې ته اړتیا لري.
دغه ګوند لیکلي: «په ژورې خواشینۍ او غم سره مو خبر ترلاسه کړ، چې د یکشنبې په شپه د هېواد په شمال په ځانګړي ډول د سمنګان، بلخ، بغلان او تخار ولایتونو کې د سختې زلزلې له امله ګڼې زېربناوې ویجاړې شوې دي او یو شمېر هېوادوال مو شهیدان او ټپیان شوي دي.»
دا په داسې حال کې ده، چې د طالبانو د عامې روغتیا وزارت ویاند ویلي چې د افغانستان په شمال په ځانګړي ډول بلخ او سمنګان ولایتونو کې د زلزلې له امله تر دې دمه د ۲۷ تنو مړینه تایید شوې او ۷۳۰ نور ټپیان دي. شرافت زمان امرخېل وویل، چې د قربانیانو شمېر مخ پر ډېرېدو دی.
