د افغانستان په شمالي ولایتونو او په ځانګړې توګه سمنګان او بلخ ولایتونو کې زلزله ځپلي وايي، که ژر یې لاسنیوی ونهشي؛ نو دوی به له جدي ستونزو سره مخ شي. د بلخ د شولګرې ولسوالۍ اوسېدونکی محمد ظریف وايي، چې زلزلې درانه زیانونه ور اړولي او بېګاه شپه یې د شنه اسمان لاندې تېره کړې ده.
نوموړی وايي: « د زلزلې زورورو ټکانونو په یوه شېبه کې هرڅه ګډوډ کړل. زه او ماشومان مې لږ ژوبل شوي یو؛ خو په چم ګاونډ کې یې لویه تباهي کړې ده، دېوالونو درز کړی او له وېرې مو شپه په بیدیا وه.»
نوموړی وايي، ډېری کورونه ویجاړ او یاهم د ویجاړېدو له ګواښ سره مخامخ دي او سلګونه کورنیو د بیدیا په سړه هوا کې شپه سبا کړې ده. په ورته وخت کې د سیمې یو بل اوسېدونکی چې نه غواړي نوم یې په راپور کې یاد شي وايي، د طالبانو د ژغورنې عملیات ډېر سوکه روان دي.
هغه وایي:« د طالبانو د ژغورنې عملیات روان دي؛ خو ډېر ورو دي او امکانات یې کم دي. که څه هم دوی وايي چې له مرکز نه یې نور وسایل غوښتي؛ خو اوس حالت بېړنی دی او هرڅه چې کېږي باید ژر وشي.»
د سیمې خلک وايي، چې د طالبانو حکومت او نړۍواله مرستندویه بنسټونه دې د ژغورنې له عملیاتو سره هممهاله د دوی د سرپناه غم هم وخوري. د افغانستان په شمال او په ځانګړې توګه په بلخ او سمنګان ولایتونو کې د وروستۍ زورورې زلزلې له کبله لسګونه کسان مړه او سلګونه نور ټپیان شوي دي.
د طالبانو د عامې روغتیا وزارت ویلي، چې لاهم د ژغورنې ډلې په سيمه کې په کار بوختې دي او ښايي د مرګ ژوبلې شمېره تر دې لوړه شي. په دې وروستيو کې د افغانستان په کونړ او ننګرهار ولایتونو کې هم د مرګونې زلزلې له کبله تر ۲۲۰۰ ډېر کسان مړه او د مالي زيان تر څنګ یې زرګونه نور ټپيان کړل.
