د ایران ولسمشر وايي «دښمن د وضعیت د لا ترینګلتیا» هڅه کوي
د ایران ولسمشر مسعود پزشکیان په یوه تلویزیوني مرکه کې وویل، چې «دښمن هڅه کوي وضعیت لا پسې ترینګلی کړي» او ادعا یې وکړه چې «روزل شوي ترهګر» یې ایران ته داخل کړي دي.
د ایران ولسمشر مسعود پزشکیان په یوه تلویزیوني مرکه کې وویل، چې «دښمن هڅه کوي وضعیت لا پسې ترینګلی کړي» او ادعا یې وکړه چې «روزل شوي ترهګر» یې ایران ته داخل کړي دي.
د پزشکیان په وینا، «بلواګر او ګډوډي کوونکي» له معترضو خلکو سره توپیر لري.
پزشکیان په دې مرکه کې وویل چې حکومت د خلکو روا غوښتنو ته ژمن دی، خو په په ورته وخت کې د بېثباتۍ، ګډوډۍ او ناارامیو د مخنیوي مسوولیت هم لري.
هغه زیاته کړه، چې د سبسایډۍ د اصلاح طرحه د بازار د ثبات، د تولید د پیاوړتیا، د خلکو د پېر ځواک د زیاتولو او د عرضې د ځنځیر د دقیق څار په موخه عملي کېږي.
د ایران ولسمشر ټینګار وکړ چې حکومت د خلکو اندېښنې درک کوي او د همدې لپاره یې داسې اجرایي جوړښت رامنځته کړی چې د مرکزي بانک رییس د ځانګړي کاري ټیم مشري پر غاړه لري او د ولسمشر او دولت ځانګړي قانوني صلاحیتونه لري، څو د اداري ستونزو او ځنډ مخه ونیول شي.
هغه له ایراني کورنیو وغوښتل چې خپلو ځوانانو ته اجازه ور نه کړي چې د ده په وینا، «د ترهګرو او ګډوډي جوړوونکو په فعالیتونو کې ښکېل شي».
په ایران کې له تېرو دوو اونیو راهیسې د ګرانیو او حکومت پرضد ولسي لاریونونه روان دي، چې تر دې دمه ۱۱۵ کسان پکې وژل شوي دي.
لاریون کوونکي، چې د ګرانیو او ایراني کرنسۍ د ارزښت پرېوتو پرضد راوتلي وو، اوس د ایران د حکومت پرضد شعارونه ور کوي او د تغییر غوښتنه کوي.
