د امریکا د کانګرېس د استازو د خونې د بهرنیو چارو د کمېټې اکثریت ډلې ویلي، چې د تهران اسلامي رژیم د خپلو خلکو ملاتړ نه لري او ایرانيان د ازادۍ غوښتونکي دي.
د بهرنیو چارو کمېټې د رسمي ایکس پوسټ له مخې، چې د ایران شاهي بېرغ هم ورسره پورته شوی، ټینګار کړی چې د ایران خلک د خپلې ټولنې او فردي حقونو د خوندي کولو لپاره د ازادۍ غوښتنه کوي او اوسنی رژیم د دوی ملاتړ نه لري.
د ایران د پخواني پاچا زوی رضا پهلوي وایي چې د ایران خلک یوازې نه دي او د نړۍ په ګوټ ګوټ کې مېشت ایرانيان د هغوی غږ پورته کوي. هغه ټینګار کړی چې د امریکا ولسمشر ډونالډ ټرمپ د ایراني ولس د زړورتیا شاهد دی او د هغوی د ملاتړ لپاره چمتو دی.
رضا پهلوي د ایکس له لارې په خپل وروستي پیغام کې خلکو ته ویلي، چې د نړۍ په بېلابېلو هېوادونو کې د دوی هېوادوال د هغوی د اعتراضونو ملاتړ کوي او د تلویزیوني خپرونو له لارې د پراخ حضور انځورونه لیدل کېږي.
هغه له خلکو غوښتي چې سړکونه پرې نه ږدي او خپلو اعتراضونو ته دوام ورکړي، او زیاته کړې ده: «زما زړه له تاسو سره دی او باور لرم چې ډېر ژر به ستاسو تر څنګ وم.»
رضا پهلوي د نړیوال ملاتړ یادونه هم کړې، په ځانګړي ډول د ټرمپ یاده یې کړې، چې د ازادې نړۍ د مشر په توګه د ایران د خلکو زړورتیا ستايي او د هغوی د ملاتړ ژمنه یې کړې ده.
د امریکا د جګړې د مطالعې ادارې (ISW) راپور ورکړی، چې د ایران په ۱۵ ولایتونو کې د خلکو لاریونونه روان دي، خو د حکومت له خوا د انټرنټ بندیز د دې اعتراضونو د خپرېدو مخه نیولې ده.
د ادارې د معلوماتو له مخې، د جنورۍ د ۱۰ مې له پیل راهیسې په ایران کې لږ تر لږه ۶۰لاریونونه ثبت شوي، چې ۲۵یې متوسط او ۸یې لوی و.
دغه اداره زیاتوي، د جنورۍ د ۹مې په پرتله، چې ۱۱۶لاریونونهیې په ۲۲ ولایتونو کې ثبت شوي و، شمېر یې کم شوی دی. د لاریونونو په شمېر کې دا کمښت لږ تر لږه د ایران د حکومت له خوا د ۴۸ ساعتونو څخه زیات وخت لپاره د انټرنټ بندیز له امله دی.
اداره همداراز وايي، د ثبت شویو اعتراضونو شمېر ښايي د واقعیت یوازې یوه برخه وړاندې کړي، ځکه انټرنټ بندیز د خلکو وړتیا محدوده کړې چې ویدیوګانې خپرې او شریکې کړي. راپورونه ښيي چې اعتراض کوونکي د سټارلینک (Starlink) میاشتني انټرنټ خدمت کاروي، څو د اعتراضونو معلومات بهرنیو رسنیو ته ورسوي.
نیویارک ټایمز د امریکایي چارواکو په حواله راپور ورکړی، چې د امریکا ولسمشر ډونالډ ټرمپ د ایران پر وړاندې د پوځي اقدام بېلابېلې لارې ارزوي، خو تر اوسه یې وروستۍ پرېکړه نه ده کړې.
د دې ورځپاڼې د راپور له مخې، امریکایي چارواکو ویلي، ټرمپ د ایران د واکمن نظام پر ضد د پوځي برید امکان په جدي ډول د خلکو د اعتراضونو د ځپلو په غبرګون کې تر بحث لاندې نیولی دی.
د امریکایي لوړپوړو چارواکو په وینا، ټرمپ ته وړاندې شوي ځینې هغه انتخابونه، چې د ایران په اړه دي، په مستقیم ډول د هغو امنیتي بنسټونو ځینې برخې په نښه کوي، چې د لاریون کوونکو د ځپلو لپاره زور کاروي.
په ورته وخت کې، دغو چارواکو خبرداری ورکړی، چې هر ډول پوځي برید باید برعکس پایله ور نه کړي، داسې نه چې د ایران ولس افکار د واکمن حکومت په ګټه راوپاروي، یا داسې غچ اخیستونکي بریدونه پیل شي چې په سیمه کې د امریکایي پوځيانو او ډیپلوماټانو ژوند له ګواښ سره مخ کړي.
په راپور کې د امریکا د یوه لوړپوړي پوځي چارواکي له قوله ویل شوي، چې سیمهییز قومندانان د هر ډول احتمالي برید تر مخه زیات وخت ته اړتیا لري، څو د امریکا پوځي دریځونه پیاوړي او د ایران د احتمالي غچ اخیستونکو بریدونو پر وړاندې دفاعي چمتووالی بشپړ کړي.
د امریکایي چارواکو په خبره، هر ډول پوځي اقدام باید د ټرمپ د هغې ژمنې ترمنځ توازن وساتي، چې غواړي د ایران واکمن حکومت ته سزا ورکړي، او د دې هڅې ترمنځ چې وضعیت لا پسې خراب نه شي.
شاهزاده رضا پهلوي وایي، د ایران واکمن نظام د خلکو د پراخو لاریونونو د مهارولو لپاره د ځواک له سخت کمښت سره مخ دی او د امنیتي بنسټونو ګڼ غړي د خلکو پر ضد د زور کارولو له امرونو سرغړونه کوي.
رضا پهلوي په یوه پیغام کې، چې د ایران خلکو ته یې ور استولی، له ټولو غوښتي چې د یکشنبې په ورځ د مازیګر په شپږو بجو په ډلهییز ډول سړکونو ته ووځي.
هغه په خپل پیغام کې ویلي: «زما هېوادوالو! تاسو د ایران په ګوټ ګوټ کې په پراخ او زړور حضور سره، د پرلهپسې درېیمې شپې لپاره د خامنهيي د ځپونکي ماشین او د هغه د واکمن نظام بنسټونه لا کمزوري کړي دي.»
رضا پهلوي ټینګار کړی، د باور وړ راپورونه ورته رسېدلي چې ښيي، اسلامي جمهوریت د خلکو د میلیوني ګڼهګوڼې پر وړاندې د درېدو لپاره د ځواک سخت کمښت لري. د هغه په وینا، تر دې دمه د وسلهوالو او امنیتي ځواکونو ګڼ غړي یا له خپلو دندو وتلي او یا یې د خلکو د ځپلو له امرونو انکار کړی دی.
هغه د ایران خلکو ته په خطاب کې ویلي: «تاسو یوازې نه یاست، نړۍ ستاسو د ملي پاڅون ترڅنګ ولاړه ده.»
د اوکراین د بهرنیو چارو وزیر اندري سیبیها وایي، د اوکراین پر وړاندې د روسیې د یرغل ملاتړ او د ایراني وګړو ځورونه د تهران د یوې داسې تګلارې برخه دي چې د تاوتریخوالي او انساني کرامت د نهدرناوي پر بنسټ ولاړه ده.
اندري سیبیها پر خپله اېکس پاڼه لیکلي، ایرانیان حق لري چې بنسټیز مدني حقونه یې خوندي وي چې پکې مالوماتو ته لاسرسی او د سولهییزو غونډو ازادي هم شامله ده. د هغه په وینا، ایراني وګړي باید له وېرې پرته یو عادي ژوند ولري، داسې ژوند چې ازادي، خونديتوب او سوکالي پکې وي.
د اوکراین د بهرنیو چارو وزیر زیاته کړې، هېواد یې د واکمنۍ له سختو بڼو تېر شوی، د زور پر وړاندې یې ولسي اعتراضونه کړي او خپلې ولسواکې پرېکړې یې ساتلې دي، له همدې امله اوکراین مدني حقونو ته لوړ ارزښت ورکوي.
هغه ټینګار کړی چې د همدې تجربې له مخې، د ایران له چارواکو غواړي د لاریون کوونکو پر وړاندې له تاوتریخوالي ډډه وکړي.
سیبیها همداراز له نړیوالې ټولنې غوښتي چې د ایران پر واکمن نظام فشارونه لا زیات کړي، ځکه د هغه په وینا، تهران هم پر خپل ولس تاوتریخوالی کوي او هم د روسیې د هغه جګړې ملاتړ کوي چې اوکراین یې «جرمي جګړه» بولي.