د اروپا په پارلمان کې د جرمني استازې او له ایران سره د اړیکو د پلاوي مشرې هانا نویمان، غوښتنه کړې چې د ایران سپاه پاسداران اداره دې د ترهګرو ډلو په رسمي نوملړ کې شامل شي.
نوموړې همدارنګه پر ایران د هدفمندو بندیزونو د لا پیاوړتیا غوښتنه کړې او ویلي یې دي چې اروپايي هېوادونه باید ایران ته د ایراني پناه غوښتونکو د بېرته ستنولو بهیر ودروي.
د عراق د وسلهوالو ډلو یو قومندان ابو عزراییل پر اېکس اعلان کړی چې د ایران د اسلامي جمهوریت ملاتړ کوي او په دې هېواد کې د خلکو د لاریونونو د ځپلو لپاره چمتو دی. نوموړي دا ادعا کړې چې دا لاریونونه د اسراییل له لوري تنظیم شوي دي.
د ایران انټرنشنل د معلوماتو له مخې، هغه وسلهوالې عراقي ډلې چې له ایران سره نږدې اړیکې لري، په دې وروستیو کې یې د نوو کسانو د جلب او جذب بهیر پیل کړی، څو د ایران له امنیتي ځواکونو سره یو ځای د اعتراضونو پر وړاندې اقدام وکړي.
د ترلاسه شوو مالوماتو پر بنسټ، شاوخوا ۸۰۰ عراقي وسلهوال کسان ایران ته لېږل شوي دي. دا کسان د کتائب حزبالله، حرکةالنجباء، سیدالشهدا او بدر په نومونو ډلو پورې تړاو لري.
سرچینې وايي، د عراق حکومتي چارواکي د دغو وسلوالو کسانو له لېږلو خبر دي، خو تر اوسه یې په رسمي ډول کوم دریځ نه دی اعلان کړی. په ورته وخت کې، نړیوالې ټولنې په ایران کې د لاریونوالو پر وړاندې د زور او تاوتریخوالي کارول په کلکو ټکو غندلي دي.
د افغانستان د مخکېني جمهوري نظام پر مهال د ارګ د. دفتر رییس عبدالکریم خُرم وايي، طالبان غواړي د باغ بالا تپه کې د ودونو تالار او د تیلو پمپ جوړ کړي. همداراز، د کابل نوي ښار پارک کې د لوړپوړیزو ودانیو د جوړولو پلان هم په پام کې نیول شوی دی.
د خُرم په وینا، دا دواړه شنې ساحې د کابل ښار دننه کې موقعیت لري، چېرته چې نفوس زیات او د اوبو سرچینې کمې دي او له همدې امله ځانګړی اهمیت لري. په وینا یې چې د دغو شنو ساحو لهمنځه وړل یا زیانمنول به د کابل ایکو سیستم ته نه جبرانېدونکی زیان ورسوي.
خُرم پر خپله اېکس پاڼه لیکلي چې باغ بالا تپه نه یوازې طبیعي، بلکې تاریخي ارزښت هم لري. د هغه په خبره، د امیر عبدالرحمن خان د قصر باغ او رستورانت باید د ملي پراختیا ادارې یا د آغا خان پراختیا ادارې په څېر مسلکي بنسټونو ته د بیارغونې لپاره وسپارل شي.
کریم خُرم ټینګار کړي چې د طالبانو د چاپېریال ساتنې اداره، د زراعت وزارت او ښاروالۍ باید خپله دنده ترسره کړي او اجازه ورنه کړي چې د څو حریصو کسانو له لوري، چې یوازې د خپلو شخصي ګټو په فکر کې دي، د کابل طبیعت، شنې ساحې او تاریخي ځایونه ویجاړ شي.
د ایران د پارلمان رییس محمدباقر قالیباف خبرداری ورکړی، که امریکا پر ایران پوځي برید وکړي، نو اسراییل او د امریکا پوځي او سمندري مرکزونه به د تهران د مشروع هدف په توګه په نښه شي.
دا څرګندونې وروسته له هغې کېږي چې د امریکا ولسمشر ډونالډ ټرمپ د ایران حکومت ته د معترضو کسانو د وژلو په تړاو خبرداری ورکړی او د خلکو د ملاتړ خبرې یې کړې دي. قالیباف وویل، د امریکا هر ډول پوځي اقدام به بېځوابه پاتې نه شي.
د ایران د پارلمان رییس زیاته کړه: «د مشروع دفاع په چوکاټ کې، موږ ځان یوازې تر برید وروسته غبرګون پورې نه محدودوو.»
هغه ټینګار وکړ چې دا پیغام ټرمپ او د هغه سیمهییزو متحدانو ته روښانه دی، څو «ناسمه محاسبه» ونه کړي.
قالیباف دا هم وویل چې ایران به د هر ډول ګواښ پر وړاندې د خپلې دفاع حق وکاروي او د دښمن د احتمالي اقدام په تمه به پاتې نه شي.
د طالبانو د لوړو زده کړو وزیر ندا محمد ندیم د یکشنبې په ورځړ(مرغومې ۲۱مه) د یوه پلاوي په مشرۍ عمان ته ولاړ. د طالبانو د لوړو زده کړو وزارت ویلي، چې د دغه سفر موخه د عمان له چارواکو سره لیدنې او د «علمي همکاریو پیاوړتیا» ده.
د یاد وزارت د معلوماتو له مخې، ندا محمد ندیم به د خپل سفر پر مهال د عمان له بېلابېلو علمي بنسټونو او ښوونیزو مرکزونو څخه هم لیدنه وکړي.وروستیو میاشتو کې مسقط ته د طالبانو د لوړپوړو چارواکو سفرونه زیات شوي دي.
له دې مخکې، د طالبانو د ټرانسپورت او هوايي چلند وزیر هم عمان ته تللی و او له هغه هېواد سره یې د ټرانسپورټ په برخه کې یو شمېر هوکړې لاسلیک کړې وې. همداراز، د طالبانو د بهرنیو چارو وزیر امیرخان متقي هم د ۱۴۰۳ لمریز کال د کب په میاشت کې مسقط ته سفر کړی و.
عمان د ۱۴۰۳ کال د وږي میاشتې په ۲۰مه نېټه په مسقط کې د افغانستان سفارت طالبانو ته وسپاره. څو ورځې وړاندې امیرخان متقي د عمان د بهرنیو چارو له وزیر بدر بن حمد البوسعیدي سره په ټیلیفوني تماس کې د دواړو هېوادونو ترمنځ د دوهاړخیزو اړیکو د پراختیا په اړه خبرې وکړې.
د طالبانو د بهرنیو چارو وزیر خپل عماني سیال ته بلنه ورکړه، څو کابل ته رسمي سفر وکړي. بدر بن حمد البوسعیدي ویلي چې په مناسب وخت کې به افغانستان ته سفر وکړي.
د طالبانو د کانونو او پټرولیم وزارت وایي، د دغه وزارت یو رسمي پلاوی چې له ۲۰ فني او مسلکي کارکوونکو جوړ شوی، د معادن او تخنیکي تفتیش انسټیټیوت غړي د ظرفیت لوړولو او مسلکي ودې د پروګرام په موخه د ۲۸ورځو لپاره ازبکستان ته سفر کړی.
نن یکشنبه د (مرغومې ۲۱مه) یوې خبرپاڼې کې لیکلي، د دغه سفر اساسي موخه د معیار لرونکو لابراتوارونو بېلابېلو فني څانګو لیدنه، د پرمختللو لابراتواري تجهیزاتو او میتودونو پېژندنه او د عملي تجربو تبادله ده.
د خبرپاڼې پر بنسټ، دا سفر د طالبانو او ازبکستان تر منځ د فني او علمي همکاریو په چوکاټ کې ترسره شوی او تمرکز یې په لابراتواري معیارونو ښه کولو، د کیفیت کنټرول او د کانونو په برخه کې د فني ظرفیتونو لوړولو باندې دی.
د طالبانو له واکمنۍ راهیسې سره له دې چې ازبکستان طالبان په رسمیت ندي پیژندلي؛ خو له دغې ډلې سره یې نږدې ډېپلوماټیکې او سوداګریزې اړیکې ساتلې دي.
تر دې وړاندې د طالبانو د بهرنیو چارو وزارت د سټراتیژیکو مطالعاتو مرکز رییس عبدالحی قانت د دوحې فورم په ناسته کې ویلي وو چې له تېرو څلورو کلونو ارزونو وروسته په ډاګه شوې چې د افغانستان په اړه د ازبکستان تګلاره د سوداګرۍ، ټرانزیت او اتصال په برخه کې خورا بریالۍ وه.
