آرشیف

سیمه‌ییز طالب چارواکي وایي، چې په پنجشېر او جوزجان ولایتونو کې په دوو جلا ټرافیکي پېښو کې ۵ تنه مړه او ۱۴ نور ټپیان شوي دي.

د حوثیانو اړوند المسیره ټلویزیون راپور ورکړی، چې اسراییلي ځواکونو یو وار بیا د یمن په حدیده بندر بریدونه پیل کړي دي. د راپور له مخې؛ دغه برید وروسته له هغه کېږي، چې د اسراییل پوځ له راس عیسی، حدیده او الصلیف سیمو څخه د خلکو د وتلو امر کړی و.

د سي ای اې پخوانۍ ماموره سارا اډمز د کابل د ۱۵مې ناحیې په قصبه سیمه کې پر یوه کور د طالبانو د تېرې شپې عملیاتو ویډیوګانې او تبلیغاتي خبرونو ته په اشارې سره وایي، چې دا د طالبانو له‌خوا جوړه شوې ډارمه ده.

د ټرمپ ادارې له‌خوا د کډوالۍ سیاستونو سختولو وروسته، لاریونونه د ټېکزاس ایالت ډالاس او اسټین ښارونو ته هم وغځېدل.

د طالبانو پوهنې وزارت خبر ورکړی، چې د دغه وزارت د ښوونې او روزنې مرستيال سخاء الله سعيد په مشرۍ یو دوه کسيز پلاوی د پوهنې د وزيرانو په درېيم نړۍوال کنفرانس کې د ګډون په موخه د روسیې فدراسيون کازان ښار ته په رسمي سفر ولاړ.

ډونالډ ټرمپ د خپلې بهرنۍ پالیسۍ تر ټولو لوړپوړي ټیم سره د ایران اټومي ناورین او د غزې جګړې لپاره د امریکا د ستراتېژۍ په اړه په ډیویډ پوځي کمپ کې یوه ستراتېژیکه ناسته کړې ده.

په غزه کې د اسراییل په بریدونو کې د وژل شویو خبریالانو شمېر ۲۲۷ ته لوړ شو. دغه شمېره په غزه کې د اسراییل په تازه بریدونو کې د یوه خبریال له وژل کېدو سره لوړه شوه.

د امریکا سترې محکمې منلې، چې د يوه امريکايي پخواني سرتېري ونسټن هېنسلي قضیه اوري. هېنسلي ادعا کړې، چې په افغانستان کې د يوه قراردادي شرکت د بې غورۍ له امله سخت ټپي شوی دی.

د افغانستان د فوټبال ملي لوبډله د اسیا جام غوراوي لوبه کې نن شپه د سوریې لوبډلې پر وړاندې د لوبو ډګر ته ښکته کېږي. دغه لوبه نن شپه د کابل په وخت ۹:۴۵ د سعودي عربستان په کوربه‌توب پیلېږي.

پنټاګون وایي، چې ټرمپ لاس انجلس ته د ملي ګارډ ۲زره اضافي ځواکونه لېږي. تر دې وړاندې د کلیفورنیا والي ګوېن نیوسام ویلي و، خبر شوی چې د امریکا ولسمشر ډونالډ ټرمپ لاس انجلس ته د ملي ګارډ دوه زره نور ځواکونه لېږي.

لږ تر لږه ۶۰ د افغانستان د بشري حقونو او مدني ټولنو سازمانونو په یوه پرانیستي لیک کې د هالنډ له حکومته غوښتي، چې په دغه هېواد کې د افغانستان سفیر اصف رحیمي ډیپلوماټیک ماموریت لغوه کړي.

د امریکا د متحده‌ایالاتونو ولسمشر ډونالډ ټرمپ وايي، چې د سټارلېنک انټرنېټي خدمتونه به په سپینه ماڼۍ کې دوام ولري. دا څرګندونې داسې مهال کېږي، چې د سټارلېنک او ټېسلا شرکتونو د مشر اېلان ماسک او ټرمپ ترمنځ اړیکې پیکه شوې دي.

د ایران د اوبو د صنعت ویاند عیسی بزرګ‌زاده وایي، چې له افغانستان سره د هلمند د اوبو د حقابې په تړاو روانې خبرې تر اوسه د پام وړ پایله نه لري او له افغانستانه ایران ته د اوبو جریان له ټاکل شوې کچې ښکته پاتې شوی دی.

د امریکا فدرالي څارنوالانو یو روسي‌الاصله کس تورن کړی، چې له ۵۰۰ میلیونو ډالرو څخه زیاتې پیسې یې د بندیزونو لاندې روسي ادارو لپاره سپینولې او له صادراتي مقرراتو سره په مخالفت کې یې محرم ټکنالوژي روسیې ته لېږدولې ده.

اوکرایني چارواکي وايي، روسیې د اوکراین پر بېلابېلو سیمو د نږدې ۵۰۰ بې‌پیلوټه الوتکو برید کړی چې دا د شپې له‌خوا پر کېیف د مسکو تر ټولو لوی برید بلل کېږي. دا برید داسې مهال کېږي، چې د دواړو خواوو ترمنځ د سولې خبرو‌اترو تر اوسه هېڅ پایله نه ده ورکړې.

د ایران د بهرنیو چارو وزارت ویاند اسماعیل بقایي وایي، له امریکا سره د اټومي خبرو بل پړاو ټاکل شوې ده چې د یکشنبې په ورځ (د غبرګولي ۲۵مه) په عمان کې ترسره شي. تر دې وړاندې د امریکا ولسمشر ډونالډ ټرمپ ویلي و، چې د خبرو بل پړاو به د پنجشنبې په ورځ د غبرګولي ۲۲مه ترسره شي.

د اټومي انرژۍ ادارې مشر رافېل ګروسي خبرداری ورکړی، چې د ایران پر اټومي تاسیساتو د اسراییل د برید په صورت کې به تهران دې ته وهڅول شي څو د اټومي وسلو جوړېدو ته مخه کړي.

د طالبانو ویاند ذبیح‌الله مجاهد د دوشنبې په ورځ د وزیرانو د سرپرستۍ په اړه وویل، چې د ځینو سیاسي ملاحظاتو له امله د طالبانو حکومت د سرپرست وزیرانو له لوري اداره کېږي. دا په داسې حال کې ده، چې هغه د موقتي کابینې د لاملونو په اړه وضاحت ورنه‌کړ.

د امریکا ولسمشر ډونالډ ټرمپ د کلفورنیا د والي ګیوېن نیوسوم د نیولو ملاتړ کړی دی. هغه دا څرګندونې تر هغه وروسته کړي، چې نیوسوم لاس انجلس ته د ملي ګارډ ځواکونو له لېږلو سره مخالفت کړی او دا یې «ناقانونه» اقدام بللی دی.

د ملګرو ملتونو د کډوالو عالي کمېشنرۍ (یواېن‌اېچ‌سي‌ار) د معلوماتو له مخې، د ۲۰۲۳ کال د اکتوبر له میاشتې د ۲۰۲۵ کال د مې تر پایه پورې له پاکستانه د شړل شویو افغانانو شمېر له ۱ میلیونه او ۵۵ زرو څخه اوښتی چې دا په وروستیو کلونو کې بې‌ساری شمېر دی.

د افغانستان انټرنشنل معلومات ښيي، چې د بلاروس او پولنډ ترمنځ د برېست نومې سرحدي سیمه اوس د سلګونو بې برخلیکه افغان کډوالو لپاره په زندان بدل شوی دی. دغه کډوال چې ډېری یې ځوانان، ماشومان او ښځې دي، له سختو انساني ناورینونو سره مخ دي.