هند او پاکستان له اوربند وروسته

د هند د دفاع وزیر راجه نات سېنګ پاکستان ته په اشارې سره ویلي، چې د سندور عملیات پای ته نه دي رسېدلي او «د فلم ننداره خو لا پاتې ده.» هغه زیاته کړه: «ټوله نړې په دې ښه پوهېږي، چې مونږ څنګه د پاکستان په خاوره کې د ترهګرو مرکزونه له منځه یوړل.»

د هندي رسنې بهارت د راپور له مخې، د دغه هیواد د دفاع وزیر نات سېنګ په بهیج هوایي اډه کې د سرتېرو سره په خبرو کې وویل: «دا وړه خبره نه ده چې زمونږ هوایي ځواک د پاکستان هرې برخې ته لاسرسی لري.»

هغه پاکستان ته په اشارې سره په طنزیه انداز وویل: «دا خو یوازې د فلم سر و، د وخت په راتګ سره به ټول فلم درننداره کړم.»

د پاکستان د بهرنیو چارو وزارت ویاند شفقت علي خان ویلي، چې له هند سره شوی «اوربند» ښه اقدام دی او نوی ډیلي باید ورته ژمن پاتې شي. هغه تېره ورځ یوې خبري غونډه کې د امریکا له ولسمشر ډونالډ ټرمپ او د دغه اوربند په رامنځته کولو کې له ښکېلو هېوادونو مننه هم کړې.

د پاکستان لومړي وزیر شهباز شریف د چهارشنبې په ورځ هند ته د کشمیر د شخړې او د اوبو مسلې په ګډون د ټولو جنجالي مسلو د حل لپاره د هر اړخیزو خبرو اترو بلنه ورکړه.

د پاکستان ډان ورځپاڼې د راپور له مخې؛ نوموړي دغه وړاندیز د سیالکوټ پسرور سیمې ته د خپل سفر په لړ کې کړی.
هغه دارنګه د هند او پاکستان ترمنځ وروستۍ شخړې ته په اشارې سره ویلي، چې پاکستان د ۱۹۷۱ کال د جګړې "غچ" اخیستی دی.
هغه د هند لومړي وزیر نریندرا مودي ته د راتلونکي یرغل په وړاندې خبرداری ورکړ او ویې ویل:« که تاسو پر موږ یو وار بیا برید وکړئ؛ نو تاسو به هرڅه له لاسه ورکړئ. موږ د جګړې او خبرو اترو لپاره چمتو یو. اوس انتخاب ستاسو دی.»
هغه یو وار بیا له مودي وغوښتل، چې اختلافات پرېږدي او خبرو ته کېني،« راځئ، چې دا اور مړ کړو. راځئ، چې د کشمیر او اوبو په اړه د خبرو اترو لپاره سره کېنو. اوبه زموږ لپاره سره کرښه ده.»

د چین د بهرنیو چارو مرستیال وزیر سن ویډونګ ویلي، چې چین د پاکستان او هند ترمنځ د اوربند د ټینګېدو هرکلی او ملاتړ کوي. هغه له دواړه هېوادونو غوښتي، چې شته ستونزې د خبرو له لارې حل کړي.

نوموړي دغه څرګندونې په چین کې د پاکستان له سفیر خلیل هاشمي سره د لیدنې پرمهال کړې دي.
ډان ورځپاڼې د ښاغلي سن په حواله لیکلي، چین چمتو دی چې د هند او پاکستان ترمنځ د شخړې د حل په برخه کې رغنده رول ولوبوي.
په دغه لیدنه کې دواړه خواوو د چین او پاکستان د اړیکو، نړۍوال او سیمه‌ییز وضعیت په اړه خبرې کړې دي.

د پاکستان د بهرنیو چارو وزارت وایي، چې د هند د عالي کمېسیون یو کارکوونکی یې په اسلام اباد کې د «مطلوب کس» په توګه اعلان کړی او له هغه یې غوښتي چې په ۲۴ساعتونو کې له دغه هېواده ووځي.

دغه وزارت پر اېکس پاڼه کاږلي، چې د دغه کس وظیفوي حیثیت د هغه له فعالیتونو سره سمون نه لاره.
دغه وزارت زیاته کړې، چې په دې اړه یې د هند شارژدافیر هم تېره ورځ د بهرنیو چارو وزارت ته وربللی و او د دغې پرېکړې په اړه یې ورته ویلي ویلي و.

هندي رسنۍ «اې اېن ای» د خپلو سرچینو په حواله خبر ورکړی، چې د جمو او کشمیر په شوپیان سیمه کې د یو لړ عملیاتو پرمهال د لشکر طیبې درې وسله‌وال وژل شوي دي.

په دغه راپور کې راغلي، چې له دې ډلې د دوو وسله‌والو هویت په ډاګه شوی؛ خو د یو بل په اړه یې څېړنې روانې دي.
د راپور له مخې، دغه کسان په ګڼو نورو «ترهګریزو» پېښو کې هم ښکېل وو.
د دغه دوو پېژندل شویو کسانو نومونه عدنان او شاهد کوټي ښودل شوي، چې دواړه د شوپیان سیمې اوسېدونکي دي.

راپور زیاتوي، چې دغه کسان د استخباراتي معلوماتو پر بنسټ د یو لړ عملیاتو پرمهال وژل شوي دي.

د پاکستان تحریک انصاف ګوند مشر بیرسټر ګوهر د هند او پاکستان ترمنځ شوي اوربند او خبرو اترو ته په اشارې ویلي، چې له دښمنانو او بهرنیانو سره سوله کېدای شي؛ نو باید له خپلو خلکو سره هم وشي.

هغه له جيونيوز سره په خبرو کې ويلي: «که تاسو د یو چا مور او پلار په زندان کې وساتئ؛ نو د هغوی ماشومان به تر کله ستاسو ملاتړ وکړي؟ دوی به تر کله ستاسو سره غم او ښادي نمانځي او ولې یې ونمانځي؟»
هغه ويلي، ولس اوس یو شوی او غوره ده چې له دغه يووالي ګټه واخیستل شي او عمران خان خوشې شي.
هغه زیاته کړې، د ګوند مشرانو ته باید اجازه ورکړل شي چې د تحریک انصاف له بنسټ اېښودونکي او بشرا بي‌بي سره وګوري او په سیاسي چاپېریال کې روان تاوتریخوالی کم شي.

د پاکستان د بهرنیو چارو وزیر اسحاق ډار ویلي، که چېرې د دغه هېواد او هند ترمنځ په راتلونکو خبرو اترو کې «د اوبو ستونزه حل نشي»؛ نو د هند او پاکستان ترمنځ شوی اوربند به له ګواښ سره مخ شي.

هغه د سي اېن اېن سره په یوه مرکه کې ویلي، چې د اوبو د ستونزې په حل کې پاتې راتلل به «د جګړې لامل شي.»

د پاکستان پوځ د عامه اړیکو څانګه (ای ایس پي ار) وایي، چې د هند له‌خوا په بریدونو کې د دوی ۱۱ پوځيان وژل شوي او ۷۸ نور ټپیان دي. د پوځ په اعلامیه کې راغلي، چې په وژل شویو کې ۶ تنه د پاکستان د پلیو ځواکونو او ۵ د هوایي ځواک غړي شامل دي.

اعلامیه زیاتوي، چې په دغه بریدونو کې سربېره پر دې، ۴۰ ملکې وګړي وژل شوي او ۱۲۱ نور ټپیان شوي دي.

په ملکي وژل شویو کې ۷ ښځینه او ۱۵ ماشومان هم شامل دي.

بلخوا د ۱۲۱ ټپي ملکي وکړو له جملې څخه یې ۱۰ ښځې او ۲۵ ماشومان دي.

د هند لومړي وزیر نریندرا مودي پاکستان ته خبرداری ورکړی، چې که پر هند کوم بل ترهګریز برید وشي، نو نوی‌ډیلی به بیا هم د پولې هاخوا د «ترهګرو پټنځایونه» په نښه کړي.

د رویټرز خبري اژانس د راپور له مخې، مودي زیاته کړې: «دا ځل به مونږ له هغه څه ونه وېرېږو چې اسلام اباد یې اټومي ګواښ بولي.»

لومړی وزیر مودي، پاکستان ته دا خبردارۍ وروسته له هغې ورکوي، چې د امریکا ولسمشر وویل، «د هند او پاکستان ترمنځ یې د اټومي جګړې مخه ونیوله.»