روزنامه فایننشل تایمز نوشت در حالی که جامعه جهانی چگونگی به‌رسمیت شناختن طالبان را سبک سنگین می‌کند، تاجیکستان تصمیم خودش را گرفته و با پناه دادن به رهبران مقاومت ملی مانند احمد مسعود، تبدیل به پایگاه مقاومت و صدای رسای مخالفت با طالبان شده است.
به نوشته فایننشل تایمز، افزون بر احمد مسعود، فرزند احمدشاه مسعود و رهبر جبهه مقاومت ملی، امرالله صالح که خود را سرپرست ریاست‌جمهوری افغانستان می‌داند و عبداللطیف پدرام، رهبر حزب کنگره ملی افغانستان و شماری دیگر از رهبران و سیاستمداران ضدطالبان هم در تاجیکستان اقامت دارند.
تاجیکستان از نخستین روزهای سقوط دولت اشرف غنی بر حق مردم افغانستان برای تعیین سرنوشت‌شان تاکید کرد و طالبان را به رعایت حقوق اقوام غیرپشتون، به ویژه تاجیک‌های افغانستان فراخواند.
روزنامه انگلیسی فایننشل تایمز می‌نویسد که تاجیکستان نگران است که قدرت گرفتن طالبان، باعث نفوذ اسلام‌گرایی افراطی به آن کشور و سرازیر شدن سیل مهاجرت شود.
