سخنگوی طالبان نگرانی‌های ولادیمیر پوتین، رییس‌جمهور روسیه درباره وضعیت امنیتی در مرز میان افغانستان و تاجیکستان را "بیجا" خوانده و می‌گوید که هیچ تهدیدی از افغانستان متوجه کشورهای منطقه نیست.
انعام‌الله سمنگانی روز سه‌شنبه گفت افغانستان تهدیدی برای کشورهای همسایه و منطقه نیست.
ولادیمیر پوتین اخیرا در ملاقات با امام علی رحمان، رییس‌جمهور تاجیکستان گفته است که وضعیت امنیتی در مرز افغانستان و تاجیکستان نگران کننده است.
آقای پوتین خطاب به رییس جمهور تاجیکستان گفت: "طبق توافق ما، مقداری تسلیحات و تجهیزات برای تقویت نیروهای مسلح تاجیکستان تحویل داده شده است تا تاجیکستان بتواند به طور موثر با هر گونه تهدیدی مقابله کند که از خارج برای کشور شما سرچشمه می‌گیرد."
آقای سمنگانی افزود: "امارت اسلامی افغانستان ...چنانکه در داخل کشور امنیت را تامین کرده از مرزهای کشور هم حراست و حفاظت می‌کند و نگرانی‌های که در این مورد مطرح می‌شود بیجاست."
معاون سخنگوی طالبان همچنین گفت که تا کنون هیچ تهدیدی از افغانستان به کشورهای همسایه و منطقه پیش نشده است و آنان برای تا امنیت مرزهای این کشور متعهد اند.
تاجیکستان که بیش از ۱۳۵۷کیلومتر مرز با افغانستان دارد، بارها نگرانی خود را در مورد جنگ و ناامنی در افغانستان و گسترش و نفوذ دهشت افگنان از این کشور به تاجیکستان ابراز کرده است.
پس از تسلط طالبان بر افغانستان، نظامیان روسیه در تاجیکستان تمرینات نظامی را راه اندازی کرده و پایگاه‌های نظامی خویش را تقویت کرد.