شاخه خراسان گروه داعش با نشر پیامی مسئولیت حمله راکتی از خاک افغانستان بر نقاط مرزی تاجیکستان را به عهده گرفت. داعش محل این حمله را ولسوالی خواجه غار ولایت تخار گفته است. رسانه‌های محلی گزارش داده اند که این حمله شام روز شنبه از افغانستان بر نقاط مرزی تاجیکستان صورت گرفت.
در همین حال، یک منبع از مرز تاجیکستان به خبرگزاری اسپوتنیک بخش تاجیکستان گفت: «به مرزبانان و پایگاه‌های ما هیچ آسیبی نرسیده است.»
منابع محلی می‌گویند نظامیان تاجیکستانی در واکنش به شلیک چندین موشک از خاک افغانستان، بر ولسوالی خواجه غار تخار گلوله‌باری کرده‌اند.
این دومین همسایه افغانستان است که از سوی داعش مورد حمله قرار می‌گیرد. پیش از این اعماق، خبرگزاری داعش، با نشر یک ویدیو مدعی شد که شاخه خراسان داعش، «۱۰ راکت کاتیوشا» را بر «نیروهای حکومت ازبکستان در ترمذ» شلیک کرده است. طالبان و مقامات ازبکستان این حمله را رد کردند.
گروه طالبان تاکنون در مورد حمله راکتی به تاجیکستان واکنشی نشان نداده است
