معاون وزیر خارجه روسیه می‌گوید که اوضاع مناطق شمالی افغانستان پیچیده‌تر می‌شود و این کشور نمی‌تواند خطرات موجود در مرزهای افغانستان را نادیده بگیرد.
آندری رودنکو گفته است وضعیت مرزهای شمالی افغانستان نگرانی روسیه و تمام کشورهای آسیای میانه به ویژه تاجیکستان را برانگیخته است.
او در باشگاه گفتگوی بین‌المللی والدای گفت: "روسیه از طریق سازمان پیمان امنیت جمعی به کشورهای آسیای میانه کمک می‌کند و آمادگی خود را برای همکاری بیشتر با کشورهای منطقه اعلام می‌دارد."
دومین کنفرانس آسیای مرکزی باشگاه گفتگوی بین‌المللی والدای روز سه‌شنبه، ۲۷ ثور در شهر نیژنی نووگورود روسیه برگزار شد.
روز پنجشنبه هفته گذشته، ۲۲ ثور شاخه خراسان گروه داعش با انتشار ویدیویی از شلیک چندین موشک به خاک تاجیکستان از ولایت تخار افغانستان خبر داد.
دولت تاجیکستان نیز تأیید کرد که چند موشک به به خاک این کشور اصابت کرده است، اما گفت این موشک‌ها در جریان درگیری میان طالبان و داعش "به طور تصادفی" به سوی این کشور پرتاب شده است.
تنها یک روز بعد از انتشار این ویدیو، امام‌علی رحمان، رئیس‌جمهور تاجیکستان با ولادیمیر پوتین، رئیس‌جمهور روسیه گفتگوی تلفنی انجام داد.
موضوع این گفتگوی تلفنی افزایش فعالیت گروه‌های تروریستی در خاک افغانستان بوده است.
کریملین، دفتر ریاست جمهوری روسیه اعلام کرد که در این گفتگوی تلفنی تأیید شد که ادارات ذی‌صلاح روسیه و تاجیکستان به همکاری فعال خود برای تأمین امنیت در مرز تاجیکستان و افغانستان ادامه دهند.
سران کشورهای عضو سازمان پیمان امنیت جمعی نیز دو روز پیش در نشستی در مسکو نگرانی‌شان را از وضعیت امنیتی افغانستان ابراز کردند.