تام وست، نماینده ویژه امریکا در امور افغانستان به ادامه سفرهای منطقه‌ای خود، روز سه‌شنبه، ۱۰ جوزا به تاجیکستان رفت.
او در این سفر با سراج‌الدین مهرالدین، وزیر امور خارجه تاجیکستان دیدار و در باره «افغانستان و مبارزه با تروریزم بین‌المللی» گفتگو کرده است.
وزارت خارجه تاجیکستان در خبرنامه‌ای می‌گوید که در این دیدار بر مبارزه با افراط‌گرایی نیز تاکیده شده است.
به اساس خبرنامه وزارت خارجه تاجیکستان، نماینده ویژه امریکا در امور افغانستان و وزیر خارجه تاجیکستان بر ضرورت گسترش همکاری‌های دوشنبه و واشنگتن برای تحکیم حفاظت از مرز تاجیکستان و افغانستان و ارائه کمک‌های بشردوستانه به مردم افغانستان تاکید کرده‌اند.
تام وست اخیراً سفرهای منطقه‌ای خود برای گفتگو و دیدار با شماری از چهره‌های سیاسی و شهروندان افغانستان را آغاز کرده است. او پیش از سفر به تاجیکستان به هند، ازبکستان و ترکیه رفت و با شماری از چهره‌های سیاسی افغانستان گفتگو کرد.
همچنین گفته می‌شود که یکی از اهداف سفر آقای وست به تاجکیستان دیدار با شماری از «چهره‌های ضد طالبان» و از جمله احمد مسعود بوده است. تاکنون جزییات بیشتری از سفر نماینده ویژه امریکا به دوشنبه و دیدار او با این چهره‌ها منتشر نشده است.
آقای وست پیش از سفر به تاجیکستان به ترکیه رفته و با شماری از چهره‌های سیاسی افغانستان دیدار کرده بود.
به گفته تام وست، این چهره‌های سیاسی از نبود روند سیاسی برای گفتگو و مشارکت در افغانستان انتقاد کرده اند.
آقای وست در صفحه توییترش نوشت: «در ملاقات‌هایم از شخصیت‌های افغان شنیدم که خشونت راه درستی برای مردم افغانستان نیست و آنها تعامل و شرکت در یک روند سیاسی را ترجیح می‌دهند.» اما به گفته نماینده ویژه امریکا، این چهره‌های افغان «از فقدان چنین روندی در کشور سرخورده و ناراض» هستند.
تام وست در حالی با مقام‌های تاجیکستان در باره افغانستان و مبارزه با تروریزم بین‌المللی گفتگو می‌کند که این کشور اخیراً میزبان یک نشست منطقه‌ای در باره افغانستان بود. در این نشست مشاوران امنیت ملی کشورهای هند، ایران، روسیه، قزاقستان، چین، قرقیزستان، تاجیکستان و ازبکستان در باره تحولات افغانستان و تهدیداتی که منطقه با آن مواجه است، گفتگو کردند. کشورهای شرکت‌کننده این نشست از حضور تروریستان بین‌المللی در افغانستان ابراز نگرانی کرده و بر همکاری مشترک برای تأمین امنیت منطقه و تشکیل دولتی فراگیر در افغانستان تأکید کردند.