تام وست، نماینده امریکا برای افغانستان می‌گوید که در سفر اخیرش به دوشنبه، گفتگوهای «پرباری» با مقامات تاجیکستان در مورد «منافع مشترک دو طرف در افغانستان» داشته است.
مقامات تاجیک در این دیدار نگرانی خود را از وقوع بی ثباتی در افغانستان به علت نبود حکومت فراگیر ابراز کردند.
وست در سفری دو روزه به دوشنبه، با امام علی رحمان، رئیس جمهور، سراج‌الدین مهرالدین، وزیر امور خارجه و برخی مقامات دیگر تاجیکستان ملاقات کرد.
وست در رشته توییت‌هایی نوشت که تاجیکستان «نگرانی‌های مشروع از تهدیدات امنیتی» از جانب افغانستان دارد.
او نوشت: «امریکا و تاجیکستان می‌خواهند که یک روند مشروع سیاسی در افغانستان شکل بگیرد تا تمام گروه‌ها در آن مشارکت داشته باشند. بدون این روند ما شاهد بی‌ثباتی بیشتر[در این کشور] خواهیم بود.»
وست افزود: «امریکا به مشوره و همکاری نزدیک با تاجیکستان در مورد افغانستان ادامه خواهد داد.»
وست قبل از سفر به تاجیکستان، در ترکیه با سیاستمداران افغان دیدار کرد اما اشاره‌ای به ملاقات با سیاستمداران افغان ساکن تاجیکستان نکرد که پس از سقوط حکومت غنی به آنجا فرار کردند.
با این حال، گفته می‌شود که آقای وست در تاجکیستان با شماری از «چهره‌های ضد طالبان» و از جمله احمد مسعود دیده بود، اما تاکنون جزییات این دیدارها نشر نیافته است.