وزیر داخله تاجیکستان: پس از تسلط طالبان بر افغانستان قاچاق مواد مخدر در مرزها بیشتر شد

۱۴۰۱/۴/۲۹

وزیر داخله تاجیکستان می‌گوید پس از تسلط طالبان بر افغانستان قاچاق مواد مخدر در مرزها بیشتر شده است.

رمضان رحیم‌زاده گفت طالبان در جلوگیری از قاچاق مواد مخدر موفق نبوده‌اند.

تاجیکستان می‌گوید از ابتدای سال ۲۰۲۲ تاکنون ۱۱ افغان را به جرم قاچاق مواد مخدر دستگیر کرده است.

از زمان قدرت‌گیری طالبان در آگست سال ۲۰۲۱، تاکنون چندین محموله بزرگ مواد مخدر در کشورهای آسیای میانه کشف شده است. محموله‌هایی که از افغانستان بار زده شده بودند.

پیش‌ از این گزارش‌هایی وجود داشت که نشان می‌داد قاچاق مواد مخدر یکی از راه‌های تمویل ماشین جنگی طالبان طی ۲۰ سال گذشته بود.

رحمت‌الله نبیل، رئیس پیشین امنیت ملی افغانستان هم چندی قبل پس از ممنوعیت کشت کوکنار توسط طالبان گفت عاملان کشت و قاچاق مواد مخدر خود رهبران طالبان هستند.

در حال حاضر روسیه، تاجیکستان و کشورهای آسیای میانه بیش از پیش نگران قاچاق مواد مخدر از افغانستان هستند.

تاجیکستان می‌گوید در نیمه اول سال ۲۰۲۲ نیروهای این کشور یک تُن مواد مخدر شامل ۵۴ کیلو هروئین، ۴۰۲ کیلو تریاک، ۴۰۳ کیلو حشیش و ۱۲۸ کیلو ماری‌جوانا کشف و ضبط کرده‌اند.

نیروهای مرزی تاجیکستان اواسط اکتوبر سال ۲۰۲۱ نیز در حدود ۵۰۰ کیلو مواد مخدر قاچاق شده از افغانستان را ضبط کردند.

وزیر داخله تاجیکستان روز گذشته در یک نشست خبری گفت «طالبان گفته بودند که با قاچاق مواد مخدر مبارزه خواهند کرد، اما ما نتیجه روشنی نمی‌بینیم. مواد مخدر بیشتر از سال گذشته کشف شده است. ما تحقق وعده‌ها را نمی بینیم.»

خبرگزاری اسپوتنیک بخش تاجیکستان به نقل از کارشناسان بین‌المللی نوشته است طالبان که منبع درآمد آن‌ها از فروش مواد مخدر بوده، نمی‌توانند به سرعت به فعالیت‌های دیگر رو آورند.

نگاه روز
خبرها
وادی رقابت

رادیو

وقت روایت شماست

فیلم‌ها و صداهای خود را برای ما
ارسال کنید