منابع افغانستان اینترنشنال از ظهور "جنبش طالبان تاجیکستان" در شمال افغانستان خبر دادند.

به گفته منابع، جنبش طالبان تاجیکستان مشغول سربازگیری شهروندان تاجیک و در پی سرنگونی حکومت امامعلی رحمان است.

منابع محلی می‌گویند اعضای این گروه به ۲۰۰ نفر می‌رسد.

این شبه نظامیان قبل از سقوط دولت افغانستان در صفوف طالبان افغانستان علیه نیروهای امریکایی و ناتو و همچنین ارتش افغانستان می‌جنگیدند، اما پس از تسلط طالبان بر افغانستان در چند ولسوالی در ولایت بدخشان در شمال شرق افغانستان در مرز تاجیکستان مستقر شدند.

منابع می‌گویند این شبه نظامیان در چهارچوب جماعت انصارالله که از سوی روسیه یک سازمان تروریستی ممنوعه شناخته شده است، فعالیت می‌کند.

ناظران معتقدند که تحریک طالبان تاجیکستان می‌تواند با شاخه داعش خراسان که شهروندان تاجیک زیادی در صفوف خود دارد، رقابت کند.

به گفته منابع، شبه نظامیان تاجیک انصارالله که در برخی ولسوالی‌های ولایت بدخشان مستقر شده‌اند به عنوان مرزبانان طالبان افغانستان عمل می‌کنند.

ظهور این جنبش مقامات تاجیکستان را نگران کرده است.

طبق گزارش منابع افغانستان اینترنشنال، در روزهای اخیر طالبان تاجیکستان یک برج دیده‌بانی را در مجاورت مرز با تاجیکستان ساخته‌اند و از آن برای نظارت بر خاک تاجیکستان استفاده می‌کنند.

براساس گزارش‌ها، مهدی ارسلان، معروف به محمد شریپوف که اهل منطقه نورآباد تاجیکستان است، رهبری طالبان تاجیکستان را به عهده دارد. برخی منابع گفتند مهدی ارسلان رهبر جماعت انصارالله را نیز به عهده دارد. مهدی ارسلان قبلا به افغانستان نقل مکان کرده در صفوف طالبان افغانستان جنگیده است.

به باور کارشناسان، ظهور طالبان تاجیکستان به عنوان یک پروژه جدید جهادی در آسیای مرکزی باعث محبوبیت بیشتر این گروه در میان جوانان رادیکال تاجیک خواهد شد.

برای دولت امام علی رحمان، رئیس‌جمهور تاجیکستان ظهور این جنبش جهادی خبر بدی است. این کشور از یک طرف با اعتراضات اخیری که در منطقه خودمختار گورنو- بدخشان رخ داد دسته و پنجه نرم می‌کند و از سوی دیگر سطح نارضایتی اجتماعی به خاطر مشکلات اقتصادی طولانی مدت در تاجیکستان افزایش یافته است.

به باور کارشناسان، به خاطر خستگی افکار عمومی نسبت به حکومت طولانی مدت امام علی رحمان و فقدان چشم انداز روشن سیاسی در این کشور، ظهور یک جریان جهادی مسلح برای نظام سکولار تاجیکستان یک چالش واقعی محسوب می‌شود.

یکی از سیاستمداران مخالف حکومت تاجیکستان اخیراً در مصاحبه گفت که تقاضا برای مخالفت قهرآمیز با رژیم خانواده امام علی رحمان در میان جامعه تاجیک قوی است. به گفته او، شهروندان تاجیک مطمین هستند که نظام سیاسی کنونی تاجیکستان را نمی‌توان به روش دموکراتیک تغییر داد.