امامعلی رحمان، رئیس‌جمهور تاجیکستان، روز جمعه ۲۲ میزان، در نشستی با سران روسیه و کشورهای آسیای میانه از حضور شبه‌نظامیان و "نیروهای انتحاری" در مرزهای افغانستان ابراز نگرانی کرد. امامعلی رحمان گفت در افغانستان ده‌ها هزار "مجاهد" به شمول "بمب‌گذاران انتحاری" آموزش می‌بینند.

طالبان به صراحت گفته‌اند که در ارتش خود واحدی از انتحاری‌ها دارند. طالبان می‌گویند وظیفه این نیروها تامین امنیت است. در یکسال گذشته تعداد زیادی از این نیروهای طالبان به شمال افغانستان اعزام شده‌اند.

به گزارش خبرگزاری ریانووستی روسیه، امامعلی رحمان گفته است «ما شاهد گسترش فعالیت گروه‌های مختلف تروریستی و افراطی در افغانستان هستیم.»

او در این نشست که روسای جمهور روسیه، قرقیزستان، ترکمنستان و ازبکستان حضور داشتند گفت «بیش از ۱۲ گروه تروریستی در افغانستان حضور دارند.»