پیام گوترش به نشست بین‌المللی در تاجیکستان: امنیت مرزها کلید مبارزه با تروریسم است

چهارشنبه ۱۴۰۱/۰۷/۲۷

دبیرکل سازمان ملل در پیامی ویدیویی به کنفرانس همکاری‌های بین‌المللی و منطقه‌ای برای مبارزه با تروریسم در دوشنبه گفت که امنیت مرزها کلید مبارزه با تروریسم است. آنتونیو گوترش در این نشست که از حضور تروریست‌ها در افغانستان ابراز نگرانی شد، تاکید بر همکاری‌های چندجانبه کرد.

آقای گوترش گفت «سازمان ملل متعهد است که دست در دست شما در این تعهد حیاتی کار کند.»

او افزود «من از تلاش‌های تاجیکستان و شرکای ما برای حمایت از همکاری‌های بین‌المللی در پیشگیری و مبارزه با تروریسم استقبال می‌کنم.»

مقام‌های تاجیکستان در این کنفرانس از افزایش قاچاق مواد مخدر از افغانستان و همچنین حضور گروه‌های تروریستی در این کشور ابراز نگرانی کردند.

وزیر داخله تاجیکستان به شرکت‌کنندگان گفته طالبان تاکنون به بیش از سه هزار نفر «از اعضای گروه‌های تروریستی» پاسپورت افغانستان را داده‌اند.

آنتونیو گوترش در این کنفرانس تاکید کرد «بیایید باهم برای تقویت صلح و حقوق بشر در آسیای میانه و فراتر از آن تلاش کنیم.»

کنفرانس «همکاری بین‌المللی و منطقه‌ای امنیت و مدیریت مرزها برای مقابله با تروریسم و ‌جلوگیری از حرکت تروریست‌ها» روز سه‌شنبه ۲۶ میزان ۱۴۰۱ برای دو روز در دوشنبه، پایتخت تاجیکستان آغاز به کار کرد.

این کنفرانس دو روزه با همکاری سازمان امنیت و همکاری اروپا، تاجیکستان، دفتر مبارزه با تروریسم سازمان ملل، اتحادیه اروپا، عربستان سعودی و قطر برگزار شده است.

بحث روز
خبر ورزشی
خبرها

رادیو

وقت روایت شماست

فیلم‌ها و صداهای خود را برای ما
ارسال کنید