نورالله ترین از رهبران جنبش تحفظ پشتون‌ها در ایالت سند پاکستان در واکنش به بازداشت شهروندان افغان توسط پولیس پاکستان، از شهروندان افغانستان خواست از «بیماری یا ظلم طالبان بمیرید، اما به پاکستان نیایید.»
اخیرا مقامات طالبان گفتند که پولیس پاکستان بیش از یک هزار تن از شهروندان افغانستان را به دلیل نداشتن اسناد قانونی در ایالت سند بازداشت کرده‌اند.
آقای ترین در یک پیام صوتی با انتقاد از کنسولگری طالبان در کراچی می‌گوید پولیس پاکستان پس از بازداشت شهروندان افغان همه چیز آنها را می‌گیرند و در زمان رهایی، کنسولگری طالبان برای کرایه موتر نیز از این افراد پول طلب می‌کند.
به گفته نورالله ترین، جنبش تحفظ پشتون‌ها در پاکستان برای رهایی شهروندان افغانستان یک وکیل گماشته و به طور رایگان این زندانیان را رها می‌کند.
آقای ترین در این پیام صوتی می‌گوید چند بار شهروندان افغان پس از رهایی از زندان، این جنبش هزینه رفتن آنها به افغانستان را تامین کرده اما با افزایش و ادامه دستگیری‌ها، این جنبش دیگر توان مالی برای بازگشت شهروندان افغان ندارد.
در روزهای اخیر ویدیوهایی در شبکه‌های اجتماعی منتشر شد که نشان می‌داد پولیس پاکستان شهروندان افغان افغان را با ریسمان بسته‌اند.
حامد کرزی، رئیس‌جمهور سابق افغانستان و وزارت خارجه طالبان از بدرفتاری پولیس پاکستان با شهروندابه افغانها در کراچی انتقاد کرده‌اند.