عصمت‌الله ایرگاشف، نماینده ویژه رئیس‌جمهور اوزبیکستان در امور افغانستان با آلگ مالگینوف، سفیر روسیه در تاشکند دیدار کرد. در بیانیه وزارت خارجه اوزبیکستان آمده است که طرفین در این دیدار اقدامات مشترک احتمالی برای حل و فصل وضعیت افغانستان را بررسی کردند.
وزارت خارجه اوزبیکستان می‌گوید در این دیدار طرفین در مورد نشست‌های بین‌المللی قریب‌الوقوع در قالب‌های مختلف با موضوع افغانستان هم تبادل نظر کردند.
اوزبیکستان گفته می‌خواهد یک گروه مذاکره بین‌المللی برای گفتگو با طالبان تشکیل دهد.
در تمامی دیدارهای نماینده ویژه اوزبیکستان با مقامات دیگر کشورها هم در این مورد گفتگو می‌شود.
مقام‌های اوزبیکستان با امینه محمد، معاون دبیرکل سازمان ملل که پیش از سفر به افغانستان به تاشکند رفته بود در مورد تشکیل این گروه هم صحبت کردند.
اوزبیکستان که روابط نزدیکی با طالبان دارد می‌گوید تشکیل چنین گروهی ضروری است.
