تاجیکستان بار دیگر خواهان ایجاد کمربند امنیتی در اطراف افغانستان شد
وزیر خارجه تاجیکستان در نشست سازمان همکاری شانگهای، خواهان ایجاد کمربند امنیتی در اطراف افغانستان شد. سراج‌الدین مهرالدین از مشکلات امنیتی و قاچاق مواد مخدر در منطقه گفت و از سازمان همکاری شانگهای خواست تا نهادی دائمی و مجزا در تاجیکستان برای مبارزه با مواد مخدر ایجاد کند.
این اظهارات به دنبال درگیری اخیر تاجیکستان با قاچاقچیان مواد مخدر از افغانستان بیان شد.
کامران رجب‌زاده، رئیس اداره نیروهای مرزی بدخشان تاجیکستان هفته گذشته در درگیری با افراد مسلحی که از افغانستان وارد شده بودند، کشته شد. کمیته امنیت ملی تاجیکستان درگیری مسلحانه و کشته شدن یک نظامی خود را در مرز افغانستان تایید کرده است.
امامعلی رحمان، رئیس جمهور تاجیکستان هم پیشتر از حضور گروه‌های تروریستی در مرز افغانستان به کشورهای منطقه هشدار داده بود.
طرح ایجاد کمربند امنیتی در اطراف افغانستان اولین بار سال گذشته توسط امامعلی رحمان در نشست سازمان پیمان امنیتی جمعی مطرح شد.
تاجیکستان از اعضای اصلی سازمان همکاری شانگهای و سازمان پیمان امنیت جمعی است.
سراج‌الدین مهرالدین در نشست وزیران خارجه سازمان همکاری شانگهای که ۱۴ و ۱۵ ثور در شهر گوای هند برگزار شده بود گفت: همه اعضا باید به طور موثر ماموریت خود را برای منافع متقابل انجام دهند.