رئیس‌جمهور تاجیکستان: شمال افغانستان به محل پرورش تروریسم بین‌المللی تبدیل شده است
رئیس‌جمهور تاجیکستان در دومین نشست سران آسیای میانه و اتحادیه اروپا در قرقیزستان، بر تقویت حفاظت از مرزها با افغانستان تاکید کرد. امامعلی رحمان هشدار داد که افغانستان، به ویژه ولایات شمالی آن به محل پرورش تروریسم بین‌المللی تبدیل شده است.
دومین نشست سران آسیای میانه و اتحادیه اروپا روز جمعه (۱۲ جوزا) در شهر چولپون آتای قرقیزستان برگزار شد.
علاوه بر امامعلی رحمان، روسای جمهور قزاقستان، قرقیزستان، اوزبیکستان، معاون نخست‌وزیر ترکمنستان و چارلز میشل، رئیس شورای اروپا در این نشست حضور داشتند.
به گزارش خبرگزاری تاس، امامعلی رحمان به شرکت‌کنندگان گفت: افغانستان همچنان یکی از بزرگترین تولیدکنندگان مواد مخدر در جهان هم هست.
به گفته وی، پس از به قدرت رسیدن طالبان، تولید مواد مخدر به طور چشمگیری افزایش یافته است.
رئیس‌جمهور تاجیکستان گفت که در شرایط کنونی افغانستان، اتخاذ اقدامات مشترک برای مبارزه با تهدید گسترش تروریسم، افراط گرایی، رادیکالیسم مذهبی، جرایم سایبری، قاچاق مواد مخدر و اسلحه را مهم می‌داند.
او همچنین بار دیگر تاکید کرد که باید در افغانستان یک حکومت فراگیر متشکل از همه اقوام در افغانستان شکیل گیرد. به گفته وی، این یک عامل کلیدی برای ثبات افغانستان است.
