وزارت خارجه طالبان یک دیپلومات را برای سفارت افغانستان در تاجیکستان تعیین کرده است. در نامه‌ای از این وزارت که یک منبع اصالت آن را به افغانستان اینترنشنال تایید کرده، فردی به نام فیض‌الله به عنوان سکرتر اول در این سفارت گماشته شده است.
بر بنیاد این مکتوب، طالبان وعده کرده است که معاش‌های شش ماهه پرداخت ناشده کارمندان سفارت افغانستان در تاجیکستان را نیز خواهد پرداخت.
تاجیکستان رابطه نزدیکی با مخالفان طالبان دارد و سفیر حکومت پیشین افغانستان در این سفارت بارها علیه طالبان موضع گرفته است. به رغم این، طالبان با این که از سوی تاجیکستان به رسمیت شناخته نشده اما قصد دارد با گماشتن یک دیپلومات به حضور خود در این کشور رسمیت ببخشد.
وزارت خارجه طالبان در این مکتوب از سفارت افغانستان خواسته است تا موضوع تقرر دیپلومات جدید را به حکومت تاجیکستان اطلاع دهد.
اما، هنوز روشن نیست که در صورت همکاری سفارت افغانستان در دوشنبه، آیا حکومت تاجیکستان مانند کشورهایی چون ترکیه و اوزبیکستان، دیپلومات طالبان را می‌پذیرد یا نه.
هیچ کشوری در دو سال گذشته طالبان را به رسمیت نشناخته است و بیشتر سفارت‌ها در اختیار سفیران و کارمندان دولت پیشین است. اما، طالبان سعی دارد با گماشتن دیپلومات‌ها در این سفارت‌ها، این وضعیت را تغییر دهد.
