سفیر روسیه از مبارزه تاجیکستان با قاچاق مواد مخدر از افغانستان قدردانی کرد
سمیون گریگوریف، سفیر روسیه در تاجیکستان، از این کشور برای «جلوگیری از جریان ایدئولوژی افراطی و مبارزه با قاچاق مواد مخدر از خاک افغانستان» قدردانی کرد. تاجیکستان در دو سال گذشته بیش از ۱۰ تن مواد مخدر را در مرز افغانستان کشف و ضبط کرده است.
به گزارش خبرگزاری تاس، سفیر روسیه در تاجیکستان گفته که مسکو در چارچوب سازمان همکاری شانگهای آماده همکاری با دوشنبه برای روی دست گرفتن مکانیسم‌های جدید برای مقابله با تهدیدهای امنیتی است.
این دیپلومات روس همچنین تاکید کرد که کشورش از پیشنهادهای امام‌علی رحمان، رئیس‌جمهور تاجیکستان در سازمان همکاری شانگهای حمایت می‌کند.
اشاره سفیر روسیه به سخنان آقای رحمان بود که گفته بود آسیای میانه باید هسته اصلی سازمان همکاری شانگهای باقی بماند.
سمیون گریگوریف گفت: «روسیه در این موضع مشترک است و در چارچوب روابط متفقین با تاجیکستان و سایر کشورهای آسیای میانه آماده است تا روی حل و فصل مسائل مهم کار کند.»
