جاپان به تقویت امنیت مرز تاجیکستان با افغانستان کمک می‌کند

شنبه ۱۴۰۲/۱۱/۲۱

سفیر جاپان در دوشنبه اعلام کرد که این کشور از طریق آژانس همکاری بین‌المللی کشور خود (جایکا) به تقویت امنیت مرز تاجیکستان با افغانستان کمک می‌کند.

توشیهیرو آیکی گفت چالش‌هایی وجود دارد که نه تنها تاجیکستان بلکه بیشتر کشورها با آن مواجه‌اند.

توشیهیرو آیکی افزود که جاپان و برنامه توسعه ملل متحد، برای اجرای موفقیت‌آمیز پروژه‌های متعدد در تاجیکستان با همدیگر همکاری می‌کنند. او به گونه مثال از پروژه «مدیریت مرزی» نام برد که توسط جاپان و برنامه توسعه ملل متحد و با حمایت دولت تاجیکستان انجام می‌شود.

به گفته این دیپلومات جاپانی، هدف این پروژه نه تنها تقویت مرزهای باز و امن تاجیکستان و افغانستان است، بلکه بر تجارت فرامرزی نیز تمرکز دارد.

طبق اطلاعاتی که در وبسایت برنامه توسعه ملل متحد در تاجیکستان منتشر شده، پروژه «مدیریت مرزی» در سال ۲۰۱۵ راه‌اندازی شد. این پروژه در سال ۲۰۲۳ آغاز و سپس تا سال ۲۰۲۵ تمدید شد.

اطلاعات منتشر شده نشان می‌دهد که برنامه حمایتی جاپان و سازمان ملل برنامه‌های آموزشی برای مرزبانان و افسران گمرک تاجیکستان را نیز شامل می‌شود.

جاپان می‌گوید با حمایت مالی از برنامه توسعه سازمان ملل متحد در نظر دارد ظرفیت‌های ملی را در پیشگیری از افراط‌گرایی در آسیای مرکزی گسترش دهد.

خبرهای بیشتر

پربیننده‌ترین ویدیوها

خبرها
جهان‌نما
جهان‌نما
خبرها

رادیو

پادکست‌ها

خانه‌اى براى صداى شما

فیلم‌ها و صداهای خود را برای ما ارسال کنید.