وزارت خارجه تاجیکستان روز شنبه ادعای یک مقام ارشد امنیتی روسیه را رد کرد که گفته است سفارت اوکراین در دوشنبه شهروندان تاجیکستانی را برای جنگ علیه روسیه استخدام می‌کند.
همه چهار عامل اصلی حمله به سالن کنسرت در حومه مسکو شهروندان تاجیکستان بودند.
نیکلای پاتروشف، دبیر شورای امنیت روسیه، یکی از متحدان ارشد ولادیمیر پوتین، رئیس‌جمهور روسیه، روز چهارشنبه، بدون ارائه مدرک، گفت که «سرویس‌های ویژه اوکراین» پشت تیراندازی مرگبار کنسرت ماه گذشته در نزدیکی مسکو قرار داند. او افزوده بود که سفارت اوکراین در تاجیکستان در حال جذب جنگجو است.
اما به گزارش خبرگزاری‌های روسی، شوخین صمدی، سخنگوی وزارت خارجه تاجیکستان در واکنش به این خبر گفت: «ما متذکر می‌شویم که این ادعای مقام روسی بی‌بنیاد است.»
اوکراین هم گفته است که در حمله مرگبار به سالن کنسرت کروکوس در حومه مسکو که در آن دست‌کم ۱۴۴ نفر کشته شدند، هیچ نقش نداشته است.
داعش مسئولیت این حمله را به عهده گرفته است و منایع اطلاعاتی امریکا هم تایید کرده است که این حمله کار داعش خراسان بوده است.
با این حال، مسکو می‌گوید که عاملان این حمله را هنگام تلاش برای عبور از مرز به خاک اوکراین بازداشت کرده است. کرملین به این باور است که این افراد از سوی کی‌یف برای انجام این حمله استخدام شده بودند.