طالبان می‌گوید «ده‌ها میلیون افغانی» به سیل‌زدگان ولایت غور کمک کرده است
یک ماه پس از سیلاب‌های ویرانگر و مرگبار در ولایت غور، ملا عبدالغنی برادر، معاون اقتصادی ریاست‌الوزرای طالبان به این ولایت سفر کرد. دفتر مطبوعاتی ملا برادر بدون ارائه جزئیات می‌گوید او در این سفر «ده‌ها میلیون افغانی» به سیل‌زدگان کمک کرد.
این مقام طالبان روز پنجشنبه به غور رفت و روز جمعه با شماری از اهالی این ولایت دیدار کرد. ملا برادر گفته که برای توزیع شفاف کمک‌ها کمیته فوق‌العاده تشکیل داده است.
در اواخر ماه ثور سال جاری عبدالحی زعیم، رئیس اطلاعات و فرهنگ طالبان در غور اعلام کرد که براثر سیلاب در این ولایت دست‌کم ۵۰ نفر جان باختند.
جاری شدن سیلاب‌ها علاوه بر تلفات جانی، تلفات مالی فراوانی نیز برجای گذاشت. سیلاب‌زدگان در آن‌زمان از عدم توجه طالبان و نهادهای کمک‌رسان شاکی بودند.
معاونیت اقتصادی ریاست‌الوزرای طالبان مقدار کمک‌های نقدی به سیلاب زدگان غور را مشخص نکرده است.
