ندامت فرمانده ارشد طالبان از تهدید کردن تاجیکستان
امان‌الدین منصور، فرمانده بدخشانی طالبان، اظهارات خود درباره حمله به تاجیکستان را پس گرفت. او گفت که سخنانش قدیمی بوده و «دشمنان» آن را برای برهم زدن روابط میان دو کشور بازنشر کرده‌اند.
پیش از این، ویدیویی از این فرمانده شناخته‌شده طالبان در شبکه‌های اجتماعی منتشر شده بود که در آن، نیروهایش را مشتاق تسخیر تاجیکستان معرفی می‌کرد. وی در این ویدیو گفته بود: «اگر به نیروهایم دستور بدهم، فورا ولایت بدخشان تاجیکستان را فتح می‌کنند.»
او همچنین افزوده بود: «اگر امارت اسلامی اجازه بدهد، تصرف تاجیکستان با من. فقط مجاهدین تخار، قندوز و بدخشان برای این کار کافی اند.»
منصور در این ویدیو به حضور نیروهای روسی در تاجیکستان نیز اشاره کرده و گفته بود: «مشکل نیروهای روسی است، اما خدا آن‌ها را هم زد و درجنگ اوکراین گرفتار شدند.»
اما در ویدیوی تازه‌ای که به دست افغانستان اینترنشنال رسیده، این فرمانده ارشد طالبان می‌گوید که رقبایش ویدیوی قدیمی را بازنشر کرده‌اند تا روابط میان طالبان و حکومت تاجیکستان را تیره کنند.
او افزود که طالبان به توافقنامه دوحه پایبند است و اجازه نمی‌دهد خاک افغانستان علیه هیچ کشوری مورد استفاده قرار گیرد.
منصور گفت: «ما با تاجیکستان روابط همسایگی خوبی داریم. هیچ ضرری از آن‌ها ندیده‌ایم و آن‌ها هم ضرری از ما نخواهند دید.»
پس از تسلط طالبان بر افغانستان، روابط میان این گروه و تاجیکستان متشنج بوده است. تاجیکستان میزبان رهبران و فرماندهان جبهه مقاومت ملی است وهمواره نسبت به حاکمیت طالبان در افغانستان ابراز نگرانی کرده و بر تقویت مرزهای خود تاکید داشته است.
تاجیکستان تنها کشور منطقه است که روابط رسمی دیپلوماتیک با طالبان برقرار نکرده است. سفارت افغانستان در دوشنبه همچنان در کنترول مخالفان طالبان قرار دارد.
با این حال، اخیراً برخی مقامات طالبان از تماس‌ها و همکاری‌هایی با تاجیکستان در زمینه پروژه‌های منطقه‌ای، از جمله کاسا-۱۰۰۰، سخن گفته‌اند. منابع می‌گویند که تاجیکستان، با توجه به افزایش تهدیدها از خاک افغانستان، با طالبان روابط خود را بهتر کرده است.