تاجیکستان کارزار گسترده بازداشت و اخراج مهاجران افغان را آغاز کرده و در اقدام تازه ۱۵ روز به آنان مهلت داده است تا این کشور را ترک کنند. این اقدام موجی از ناامیدی و نگرانی را در میان هزاران مهاجر افغان به‌شمول دارندگان اقامت قانونی و اسناد معتبر پناهندگی، برانگیخته است.
بر مبنای گزارش‌ها، نیروهای امنیتی تاجیکستان در روزهای اخیر عملیات گسترده برای شناسایی، بازداشت و اخراج مهاجران افغان آغاز کرده است؛ ده‌ها مرد افغان بدون اطلاع به خانواده‌های شان از محل کارشان بازداشت شده‌اند.
یک افغان در تاجیکستان در فایل صوتی که در اختیار افغانستان اینترنشنال قرار گرفته می‌گوید نیروهای امنیتی تاجیکستان در نشستی به همه مهاجران پانزده روز مهلت داده تا این کشور را ترک کنند.
این دستور هزاران افغان را تحت تاثیر قرار دهد؛ از جمله کسانی که به‌صورت قانونی در تاجیکستان زندگی می‌کنند و در انتظار اسکان مجدد در کشورهای غربی هستند.
بسیاری از این افراد، کارمندان دولت پیشین افغانستان، نظامیان، یا کسانی هستند که با دولت قبلی همکاری داشته و پس از سقوط کابل در آگست ۲۰۲۱ از کشور گریخته‌اند.
پیشتر آژانس پناهندگان سازمان ملل اعلام کرد که اخراج اجباری مهاجران افغان از تاجیکستان غیرقانونی است. این سازمان گفت که دست‌کم ۸۰ مهاجر افغان که بیشتر آن‌ها دارای اسناد اقامت معتبر بودند در دسامبر سال ۲۰۲۴ از تاجیکستان اخراج شدند.
تا پایان سال ۲۰۲۴، حدود ۹ هزار مهاجر افغان به‌طور رسمی در تاجیکستان ثبت شده بودند. اما با مهلت ۱۵ روزه و ادامه بازداشت‌ها، شمار بیشتری را در معرض اخراج قرار می‌دهد.
