منابع: تاجیکستان روند بازداشت و اخراج مهاجران افغان را تشدید کرده است

منابع می‌گویند که نیروهای امنیتی تاجیکستان امروز، چهارشنبه شماری از مهاجران افغان را از مکان‌های مختلف، از جمله کورس، شفاخانه، مراکز خرید و دیگر نقاط این کشور بازداشت و برای اخراج به امنیت ملی منتقل کرده‌اند.

به گفته منابع، روند بازداشت مهاجران افغان در تاجیکستان از ماه‌ها به این‌سو جریان دارد، اما در گذشته در بدل پرداخت پول آزاد می‌شدند. آنها خاطرنشان می‌کنند که نهادهای رسمی، از جمله سفارت افغانستان و اتحادیه مهاجران به دلیل ترس از حکومت تاجیکستان «جرئت تایید» این موضوع را ندارند.

یک مهاجر افغان از تاجیکستان به افغانستان اینترنشنال گفت به دلیل سیاست‌های سختگیرانه حکومت تاجیکستان، «فضای خفقان» در میان مهاجران افغان حکم‌فرما است. او افزود که مهاجران از ترس شناسایی و پیگرد، نمی‌توانند علیه روند بازداشت و اخراج صدا بلند کنند.

مهاجران افغان در تاجیکستان می‌گویند که تقریبا هیچ مهاجر غیرقانونی و بدون مدرک در این کشور حضور ندارد. همه افغان‌ها با ویزا وارد این کشور شده و بسیاری آنها توسط کمیساریای عالی ملل متحد در امور پناهندگان ثبت شده‌اند.

تصاویر و ویدیوهایی که به افغانستان اینترنشنال رسیده، جریان بازداشت زنان، کودکان و خانواده‌ها را در شهرک مهاجرنشین وحدت نشان می‌دهد. در یک تصویر، شماری از کودکان در محوطه یک سازمان دیده می‌شوند. منابع گفتند این کودکان توسط نیروهای امنیتی تاجیکستان بازداشت شده‌اند. همچنین یک ویدیوی دیگر، جریان کوچ اجباری خانواده‌ها از شهرک وحدت را نشان می‌دهد.

مهاجران افغان در تاجیکستان می‌گویند که بسیاری از آنها در جریان پیگیری پرونده‌های مهاجرتی خود در کشورهای غربی قرار دارند. آنها از نهادهای بین‌المللی خواستند که به مشکلات افغان‌ها در تاجیکستان رسیدگی کنند. تعداد زیادی از این مهاجران را نظامیان و مقامات حکومت پیشین تشکیل می‌دهند.

پیش از این، برخی رسانه‌ها از راه‌اندازی کارزار گسترده بازداشت و اخراج مهاجران افغان در تاجیکستان خبر داده گفتند مقامات این کشور برای خروج افغان‌ها مهلت ۱۵ روزه تعیین کرده است. کمیته پناهندگان افغان در تاجیکستان بالافاصله خبر تعیین مهلت برای اخراج اجباری مهاجران را رد کرده بود.