پاکستان در یک ماه بیش از ۶۰ هزار مهاجر افغان را اخراج کرد

مقامات اداره مهاجرت پاکستان در تورخم روز دوشنبه، سوم سنبله، اعلام کردند که تنها در شام گذشته، ۲ هزار و ۴۱۹ مهاجر افغان دارای کارت «پی‌او‌آر» به‌گونه داوطلبانه از طریق تورخم به افغانستان بازگشته‌اند.

به گفته آن‌ها ۶۷۲ شهروند افغان که هیچ‌گونه اسنادی نداشتند، از پاکستان اخراج شده‌اند.

قرار است از اول ماه سپتمبر، روند اخراج ۱.۴ میلیون افغان دارای کارت «پی‌او‌آر» نیز آغاز شود. این تصمیم حدود ۱.۴ میلیون افغان دارنده کارت اقامت (پی‌او‌آر) را تحت تاثیر قرار خواهد داد.

علاوه بر دارندگان کارت‌های (پی‌او‌آر)، حدود ۸۰۰ هزار افغان دارای کارت‌های «شهروندی افغان» هستند. پولیس می‌گوید این افراد نیز به‌طور «غیرقانونی» در کشور زندگی می‌کنند.

یک مسئول طالبان در تورخم نیز در اول سنبله گفت که در روزهای اخیر، پاکستان بار دیگر روند اخراج مهاجران افغان را شدت بخشیده و هر روز صدها خانواده از مناطق مختلف این کشور به گونه اجباری به افغانستان فرستاده می‌شوند.