در پی درگیری اخیر نیروهای طالبان و مرزبانان تاجیکستان، مقامات دو طرف در منطقه مرزی داونگ در ولسوالی شهر بزرگ بدخشان دیدار کردند. در ویدئویی که از این دیدار به افغانستان اینترنشنال رسیده، طرفین یکدیگر را به پناه دادن و آموزش مخالفان در خاک افغانستان و تاجیکستان متهم می‌کنند.
به گفته منابع، نیروهای مرزی طالبان و تاجیکستان روز یکشنبه با استفاده از سلاح‌های سبک و سنگین درگیر شدند.
چند روز پس از این درگیری، مقام‌های طالبان و تاجیکستان روز سه‌شنبه در منطقه مرزی داونگ گردهم آمدند و گفت‌وگوی هشدارآمیز و صریحی داشتند.
شفیق‌الله حفیظی، رئیس معادن طالبان در بدخشان در این دیدار به صراحت می‌گوید که تاجیکستان ۳۵۰ مخالف مسلح این گروه را آموزش می‌دهد.
مقام‌های طالبان و تاجیکستان تاکنون در این مورد رسما اظهارنظر نکرده‌اند.
منابع به افغانستان اینترنشنال گفتند که درگیری میان طالبان و تاجیکستان پس از پیش‌روی شرکت‌های استخراج معدن چینی و تخریب بستر دریای آمو آغاز شد.
طبق ارقامی که این منبع ارائه داده است، در جریان درگیری میان طالبان و نیروهای مرزی تاجیکستان، یک عضو طالبان کشته و چهار نفر دیگر زخمی شده‌اند.
در ویدیوهایی که از درگیری در اختیار افغانستان اینترنشنال قرار گرفته، صدای شلیک شنیده می‌شود.
تاجیکستان در چند سال گذشته میزبان برخی از مقام‌های جبهه مقاومت ملی و شماری دیگر از مخالفان طالبان بوده است.
