دفتر رسانه‌های طالبان در کنر اعلام کرد که جعفر سعیدی، سفیر تاجیکستان در کابل، به کنر سفر کرده و با والی طالبان در این ولایت دیدار کرده است. هدف از این سفر ارائه کمک به زلزله‌زدگان گفته شده است. پیش از این دیپلومات‌های تاجیکستان از ملاقات‌های علنی با طالبان پرهیز می‌کردند.
در خبرنامه دفتر رسانه‌های طالبان در کنر که روز دوشنبه ۲۴ سنبله منتشر شد آمده است که در این دیدار، سفیر تاجیکستان پیام همدردی دولت کشورش را به مناسبت زمین‌لرزه مرگبار اخیر در شرق افغانستان ارائه کرده است.
بر بنیاد خبرنامه طالبان، آقای سعیدی اطمینان داده است که دولت تاجیکستان کمک‌های بیشتری برای خانواده‌های آسیب‌دیده ارسال خواهد کرد.
گفته شده است که قدرت‌الله ابوحمزه، والی طالبان در کنر در دیدار با این دیپلومات تاجیک، از کمک‌های تاجیکستان به زلزله‌زدگان قدردانی کرده است.
اولین محموله کمک‌های بشردوستانه تاجیکستان برای زلزله‌زدگان شرق افغانستان روز یکشنبه به ننگرهار رسید.
این محموله سه‌هزار تُنی که شامل مواد غذایی و غیرغذایی است، با ۹ لاری به شهر جلال‌آباد منتقل شده است. طالبان می‌گوید بیش از ۱۰۰ لاری دیگر از کمک‌های تاجیکستان وارد افغانستان خواهد شد.
طالبان گفته است کمک‌های تاجیکستان شامل ۱۲۰ لاری است که تاکنون ۹ لاری آن به جلال‌آباد رسیده است.
در زمین‌لرزه شرق کشور بیش از ۲۲۰۰ نفر جان باختند و هزاران نفر دیگر زخمی و آواره شدند. بیشتر قربانیان زنان و کودکانی هستند که به دلیل محدودیت‌های سخت‌گیرانه طالبان، دسترسی محدودی به خدمات صحی و درمانی پس از زلزله دارند.
تاجیکستان از معدود کشورهای همسایه افغانستان است که تاکنون از برقراری روابط نزدیک با طالبان خودداری کرده است. این کشور نه‌تنها سفارت افغانستان در دوشنبه را به طالبان واگذار نکرده، بلکه سطح تماس‌ها و تعاملاتش با این گروه را نیز بسیار محدود و در پایین‌ترین سطح نگه‌داشته است.