رئیس‌جمهور روسیه روز جمعه ۱۸ میزان در یک نشست خبری در شهر دوشنبه تاجیکستان گفت که طالبان در افغانستان، تلاش خود را برای عادی‌سازی اوضاع در این کشور انجام می‌دهد، اما همچنان مشکلات زیادی است. ولادیمیر پوتین در عین حال بر تقویت امنیت مرز تاجیکستان با افغانستان تاکید کرد.
او گفت: «امنیت باید در مرز بین تاجیکستان و افغانستان برقرار باشد.»
به گفته رئیس‌جمهور روسیه، خود رهبری طالبان هم وجود مشکلات در افغانستان را تائید می‌کند.
نشست خبری پوتین پس از دیدار دوجانبه او با امامعلی رحمان، رئیس‌جمهور تاجیکستان و نشست روسیه-آسیای میانه در شهر دوشنبه برگزار شد.
آقای پوتین در نشست روسیه-آسیای میانه هم گفت که گروه‌های تروریستی همچنان از خاک افغانستان برای ترویج ایدئولوژی افراطی و فعالیت‌های جنایتکارانه استفاده می‌کنند.
شوکت میرضیایف، رئیس‌جمهور اوزبیکستان در این نشست پیشنهاد کرد که روسیه و کشورهای آسیای میانه در مورد افغانستان مشاوره‌هایی در سطح بالا داشته باشند. او گفت دستور کار این جلسات می‌تواند شامل موضوعات همکاری در زمینه امنیت باشد.
