والی طالبان در بلخ پس از تاجیکستان به اوزبیکستان رفت
سخنگوی والی طالبان در بلخ اعلام کرد که یوسف وفا به همراه یک هیئت به شهر ترمذ اوزبیکستان رفته است. والی طالبان در بلخ روز پنجشنبه یکم عقرب به تاجيکستان رفت و با شماری از مقامات آن کشور دیدار و گفت‌و‌گو کرد.
حاجی زید سخنگوی والی طالبان در بلخ روز دوشنبه پنجم عقرب با نشر ويديويى از کاروان موترهای یوسف وفا، اعلام كرد که این سفر به گونه رسمی انجام شده است.
یوسف وفا، یکی از افراد مورد اعتماد هبت‌الله آخندزاده است. در ویدیویی که آقای زید منتشر کرده کاروان موترهای آقای وفا در خیابان‌های اوزبیکستان دیده می‌شود.
جزئیات بیشتری در مورد هدف از این سفر منتشر نشده و دولت و رسانه‌های اوزبیکستان نیز تا کنون جزئیاتی ارائه نکرده‌اند.
اوزبیکستان با وجود آن‌که اداره طالبان را به رسمیت نمی‌شناسد، اما برخلاف تاجیکستان، روابط دیپلوماتیک و بازرگانی خود را با طالبان حفظ کرده و پس از سقوط نظام جمهوری، مناسبات نزدیک‌تری برقرار کرده است.
