دونالد ترامپ و امامعلی رحمان، روسای رئیس‌جمهور امریکا و تاجیکستان، در حاشیه دومین نشست آسیای میانه - امریکا در واشنگتن دیدار کردند. آنها برای گشایش «صفحه جدید» میان دو کشور اعلام آمادگی کردند و بر گسترش و تقویت همکاری‌ها در زمینه اقتصاد، سرمایه‌گذاری و امنیت تاکید کردند.
رهبران دو کشور در این دیدار چشم‌انداز گسترش همکاری‌های تجاری و اقتصادی به ویژه در حوزه‌های انرژی، کشاورزی، حمل‌ونقل، علم و فناوری را بررسی کردند.
رئيس‌جمهور امریکا، روز پنجنشبه (۱۵ عقرب) از رهبران کشورهای آسیای میانه در کاخ سفید میزبانی کرد. در این دیدار رهبران قزاقستان، قرغیزستان، تاجیکستان، ترکمنستان و اوزبیکستان حضور داشتند.
دونالد ترامپ در دیدار با امامعلی رحمان تاکید کرد که واشنگتن تاجیکستان را شریک قابل اعتماد در آسیای میانه می‌داند و از حضور شرکت‌های امریکایی در پروژه‌های سرمایه‌گذاری این کشور حمایت می‌کند.
ترامپ گفت: «کشورهای ما می‌توانند در زمینه‌های مختلف از انرژی تا نوآوری دستاوردهای بزرگی داشته باشند. ما به روابط پایدار و متقابل سودمند علاقه‌مندیم.»
اماعلی رحمان نیز تاکید کرد که تاجیکستان اهمیت زیادی برای همکاری با امریکا قائل است و آماده گسترش گفت‌وگو در تمامی حوزه‌های کلیدی می‌باشد.
او افزود که ده‌ها شرکت با سرمایه امریکایی در تاجیکستان فعالیت دارند، اما ظرفیت همکاری‌های دوجانبه هنوز بسیار بالاست. امامعلی رحمان گفت: «صلح و توسعه پایدار اساس آینده مردم ما است و ما به پروژه‌های جدیدی که سود واقعی برای هر دو طرف داشته باشد، باز هستیم.»
دو طرف همچنین درباره مسایل امنیتی، مبارزه با تروریسم، افراط‌گرایی و قاچاق مواد مخدر بحث و گفت‌وگو کردند.
