هیئت تاجیکستانی با مقام‌های امنیتی طالبان در قندوز دیدار کرد
در ادامه گرمی روابط میان اداره طالبان و تاجیکستان، یک هیئت تاجیک به قندوز رفت و با مقام‌های طالبان درباره موضوعات امنیتی، استخباراتی و سیاسی گفت‌وگو کرد.
در ادامه گرمی روابط میان اداره طالبان و تاجیکستان، یک هیئت تاجیک به قندوز رفت و با مقام‌های طالبان درباره موضوعات امنیتی، استخباراتی و سیاسی گفت‌وگو کرد.
این هیئت به دعوت طالبان به این ولایت رفته است. پیش از این، یوسف وفا، والی بلخ و از چهره‌های نزدیک به هبت‌الله به دعوت تاجیکستان، به دوشنبه سفر کرده بود.
به نقل از رسانه‌های دولتی طالبان، فیض‌الله‌زاده، معاون والی ختلان تاجیکستان، با محمد خان، والی طالبان دیدار داشت. در این جلسه مسئولان استخباراتی، امنیتی، تجاری و اقتصادی دو طرف شرکت کرده بودند.
علاوه بر بحث درباره مسائل امنیتی و اقتصادی، آنها درباره صدور ویزا و خدمات قنسولی به بازرگانان دو کشور نیز صحبت کردند.
تاجیکستان از جمله کشورهای معدود آسیای میانه است که کمترین روابط دیپلوماتیک با طالبان دارد، اما پس از چهار سال به نظر می‌رسد آهسته آهسته یخ روابط تاجیکستان و اداره طالبان در حال شکستن است.
دوشنبه روابط نزدیک با مخالفان مسلح طالبان دارد، اما در عین حال کوشیده است که به طالبان نیز نزدیک شود.
تا اکنون مقام بلندپایه‌ای از تاجیکستان یا افغانستان تحت کنترول طالبان به طور رسمی به دو کشور سفر نکرده است. البته، منابعی به افغانستان اینترنشنال گفتند که رئیس امنیت تاجیکستان به طور پنهانی به افغانستان سفر کرده است.
سفر یتیموف نشان می‌دهد که موضوعات امنیتی، مانند نگرانی حضور شبه‌نظامیان گروه انصارالله تاجیکستان در افغانستان، برای حکومت امامعلی رحمان از اهمیت زیادی برخوردار است.
والی طالبان در بلخ در اول عقرب از تاجیکستان دیدار کرد و در دیدار با مقامات این کشور خواستار برقراری روابط دیپلوماتیک شد.
والی طالبان در این دیدارها بر همکاری مشترک برای مقابله با تهدیدهای امنیتی تاکید کرده و گفته است که هرگونه ناامنی در افغانستان به زیان کشورهای همسایه است.
