شوکت میرضیایف، رئیس جمهور ازبکستان و وانگ یی، وزیر خارجه چین در تاشکند دیدار و درباره همکاری‌های دوجانبه و افغانستان گفت‌وگو کردند. ریاست جمهوری اوزبیکستان می‌گوید در این دیدار توجه ویژه‌ای به هماهنگی در مورد مسائل اجتماعی-اقتصادی و امنیت افغانستان شد.
وانگ یی برای شرکت در نشست گفت‌وگوی استراتژیک بین وزیران امور خارجه به اوزبیکستان رفته بود.
او پس از گفت‌وگو با رئیس‌جمهور و وزیر خارجه اوزبیکستان به تاجیکستان رفت.
چین و اوزبیکستان همانند دیگر کشورها (به جز روسیه) اداره طالبان را به رسمیت نمی‌شناسند، اما روابط دیپلوماتیک و اقتصادی گسترده دارند.
با این حال، چین و کشورهای آسیای میانه همچنان نگران نفوذ افراط‌گرایی و تهدیدات تروریستی از افغانستان اند.
در ماه جوزای امسال، رهبران چین، تاجیکستان، اوزبیکستان، قرغیزستان، قزاقستان و ترکمنستان در شهر آستانه، پایتخت قزاقستان، در یک بیانیه مشترک بر حمایت از افغانستان صلح‌آمیز، باثبات و شکوفا، عاری از تهدید تروریسم و مواد مخدر تاکید کردند.
آنها توافق کردند که به‌طور مشترک با تروریسم، جدایی‌طلبی و افراط‌گرایی مبارزه کنند.
