هیئتی به ریاست محمداسماعیل غزنوی، والی طالبان در بدخشان، برای گفت‌وگو درباره افزایش هماهنگی در گذرگاه‌ها و مسائل مرزی به تاجیکستان سفر کرده است. عابدالله فاروقی، سخنگوی پولیس سرحدی طالبان، گفت که این هیئت با شماری از مقامات بلندپایه امنیتی تاجیکستان دیدار می‌کند.
عابدالله فاروقی چهارشنبه، پنجم قوس، در یک نوار ویدیویی گفت که این هیئت با والی ولایت مختاری کوهستان تاجیکستان، معاون امنیت ملی در امور سرحدات و دیگر مسئولان امنیتی تاجیکستان دیدار و گفت‌وگو کند.
این مقام طالبان اضافه کرد که عبدالمنان حسان، معاون نظامی ریاست عمومی پولیس سرحدی اداره طالبان نیز، در ترکیب این هیئت حضور دارد.
حکمت‌الله آخندزاده، رئیس آب و انرژی طالبان در بدخشان نوشت که این هئیت در دیدار با مقامات تاجیکستانی به توافقات مهمی دست یافته است. به گفته او، دو طرف درباره جلوگیری از رفت‌آمد‌های غیرقانونی، تبادل اطلاعات استخباراتی، ایجاد بازارهای مشترک مرزی و تقویت اعتماد دوجانبه به توافق رسیده‌اند.
پیشتر یک هیئت بلندپایه تاجیکستان در ۲۶ عقرب به کابل سفر کرده و با امیرخان متقی، وزیر خارجه طالبان دیدار و گفت‌وگو کرد. طالبان اعلام کرد که با این هیئت درباره تقویت و گسترش مناسبات در زمینه‌های مختلف، به ویژه روابط دیپلوماتیک و همکاری‌های اقتصادی بحث و تبادل نظر کرده است.
پیش از این، یوسف وفا، والی طالبان در بلخ و از چهره‌های نزدیک به هبت‌الله به دعوت تاجیکستان، به دوشنبه سفر کرده بود. این مقام طالبان در سفرش به دوشنبه خواستار تحویل سفارت افغانستان شد.
تاجیکستان از جمله کشورهای آسیای میانه است که کمترین روابط دیپلوماتیک را با طالبان دارد.
حضور و فعالیت گروه‌های تروریستی در افغانستان، نگرانی‌های امینتی را برای کشورهای همسایه ایجاد کرده است.
محمد صادق خان، نماینده ویژه پاکستان در امور افغانستان و یوسف شریف‌زاده، سفیر تاجیکستان در اسلام‌آباد، روز سه‌شنبه درباره افغانستان و تقویت همکاری‌ها برای مقابله با تروریسم گفت‌وگو کردند. تضمین امنیت و ثبات منطقه از دیگر مباحث مطروحه در این دیدار بوده است.
