وزارت خارجه طالبان سهشنبه اعلام کرد که امیرخان متقی در تماس تلفنی با سراجالدین مهرالدین، وزیر خارجه تاجیکستان نسبت به کشتهشدن شهروندان چینی در مرز افغانستان و تاجیکستان ابراز تأسف کرد. متقی گفت طالبان برای تامین امنیت مرزها و تحقیقات مشترک درباره این حادثه آمادگی کامل دارد.
بر اساس خبرنامه وزارت خارجه طالبان، آقای متقی در این گفتوگو گفته در ماههای اخیر «فضای اعتماد» در همکاریهای سیاسی، اقتصادی و امنیتی میان دو کشور شکل گرفته اما برخی حلقهها میکوشند این روند مثبت را تخریب و روابط را دچار تنش کنند.
در خبرنامه مشخص نشده که منظور از حلقاتی که میخواهند روابط طالبان و تاجیکستان را تخریب کنند، چیست.
امیرخان متقی افزوده که طالبان تقویت امنیت مرزی، راهاندازی تحقیقات مشترک و انجام هماهنگیهای لازم را بخشی از تعهدات خود میداند و اقدامات مشترک علیه «عناصر شرور» را نیاز فوری و اجتنابناپذیر برای حفظ ثبات منطقهای توصیف کرده است.
در کمتر از یک هفته گذشته دستکم در دو رویداد امنیتی در مرز افغانستان -تاجیکستان شهروندان چینی کشته شدند. چین تایید کرده است که شهروندانش روز یکشنبه در یک حمله مسلحانه در نزدیکی مرز افغانستان هدف قرار گرفتهاند. روز جمعه نیز این کشور اعلام کرده بود که در یک حمله مرزی دیگر، سه شهروند چین کشته شدهاند.
تاجیکستان میگوید حمله نخست به وسیله پهپادی انجام شد که نارنجک پرتاب میکرد.
در پی این حملات سفارت چین در دوشنبه، پایتخت تاجیکستان، از شهروندان چینی در تاجیکستان خواست که فورا مناطق هممرز با افغانستان را ترک کنند. این سفارتخانه گفت که در یک هفته گذشته پنج شهروند چین در حملات مرزی از افغانستان کشته و پنج نفر دیگر زخمی شدهاند.
هنوز هیچ گروهی مسئولیت این حمله را برعهده نگرفته است.
وزارت خارجه تاجیکستان با انتشار بیانیهای گفت که این حمله در محدوده یگان مرزی «یال» واقع در ناحیه شمسالدین شاهین، در ولایت ختلان این کشور رخ داد. این شهروندان چینی برای یک شرکت محلی در جنوب تاجیکستان کار میکردند.
