در پی کشته‌شدن مرزبانان تاجیک در حمله شبه‌نظامیان از خاک افغانستان، وزیران خارجه طالبان و تاجیکستان تلفنی گفت‌وگو کردند. امیرخان متقی گفت «حلقات مغرض» در پی برهم‌زدن روابط طالبان با تاجیکستان‌اند و تحقیقات در این مورد آغاز شده است. پیشتر تاجیکستان خواهان عذرخواهی طالبان شده بود.
وزیر خارجه طالبان اعلام کرد که تحقیقات درباره حمله از خاک افغانستان به مرزبانان تاجیک با جدیت آغاز شده است. او تاکید کرد که برای جلوگیری از تکرار چنین حوادثی همکاری می‌کنند.
حکومت تاجیکستان روز پنجشنبه، چهارم جدی، اعلام کرد که سه عضو یک «سازمان تروریستی» با عبور از مرز افغانستان وارد خاک این کشور در ولسوالی شمس‌الدین شاهین شده‌اند. به گفته مقام‌های تاجیک، در جریان درگیری میان مرزبانان تاجیکستان و افراد مسلح، سه شبه‌نظامی و دو نیروی امنیتی تاجیکستان کشته شدند.
پس از این رویداد، دولت تاجیکستان از طالبان خواست به‌دلیل این حمله عذرخواهی کند. کمیته امنیت ملی تاجیکستان نیز اعلام کرد که تکرار حملات مسلحانه در یک ماه گذشته نشان می‌دهد که اداره طالبان در عمل به تعهدات بین‌المللی و وعده‌های مکرر خود برای تأمین امنیت و ثبات در مرزهای مشترک با تاجیکستان و مبارزه با گروه‌های تروریستی، به‌گونه جدی و مکرر بی‌مسئولیتی نشان داده است.
طالبان می‌گوید تحقیقات آغاز شده است
با این حال، امیرخان متقی روز شنبه، در مراسم یادبود از چهل‌وششمین سالروز تهاجم شوروی سابق به افغانستان در کابل گفت: «درباره حادثه تاجیکستان با جدیت تحقیقات را آغاز کرده‌ایم.»
آقای متقی افزود که در پی این حادثه با سراج‌الدین مهرالدین، وزیر خارجه تاجیکستان، گفت‌وگو کرده و توافق کرده‌اند برای جلوگیری از تکرار چنین رویدادهایی به‌گونه مشترک کار کنند.
با این حال، متقی هشدار داد و گفت که «برخی حلقات مغرض» در پی برهم زدن روابط طالبان با تاجیکستان هستند.
وی اظهار داشت: «نگرانی ما این است که برخی حلقات مغرض می‌خواهند روابط دو همسایه را خراب کنند و فضا را به‌گونه‌ای نشان دهند که اوضاع بحرانی است.»
آقای متقی از گروه و یا کشور مشخصی نام نبرد. اما پیشتر، برخی فعالان رسانه‌ای طالبان ادعا کرده بودند که پاکستان در پی برهم‌زدن روابط آنان با کشورهای آسیای مرکزی به ویژه تاجیکستان است؛ پاکستان هنوز به چنین ادعایی پاسخ نداده است.
وزیر خارجه طالبان همچنین تأکید کرد که همانند سایر مناطق کشور، در بدخشان نیز امنیت برقرار است. او ابراز داشت که برای جلوگیری از استفاده خاک افغانستان علیه کشورهای همسایه همکاری می‌کنند.
