روسای‌ جمهور روسیه و تاجیکستان درباره افغانستان گفت‌وگو کردند

جزئیات گفت‌وگوی آن‌ها درباره افغانستان منتشر نشده است.

اما کرملین روز چهارشنبه دهم جدی گفت که در این تماس تلفنی بر تعهد متقابل رهبران دو کشور برای تقویت بیشتر مشارکت و اتحاد استراتژیک روسیه و تاجیکستان تاکید شد.

گفت‌وگوی این مقامات درباره افغانستان در حالی انجام شده که تاجیکستان می‌گوید اخیرا از خاک افغانستان شاهد ناامنی بوده است.

کمیته امنیت ملی تاجیکستان روز پنجشنبه چهارم جدی از درگیری مسلحانه‌ با «تروریست‌هایی که از افغانستان به تاجیکستان نفوذ کرده بودند»، خبر داد. این نهاد گفت که در این درگیری سه عضو یک سازمان تروریستی و دو مرزبان تاجیکستان کشته شدند.

دفتر مطبوعاتی ریاست‌جمهوری تاجیکستان ماه قوس نیز تائید کرد که در دو حمله‌ که از افغانستان انجام شده بود، پنج نفر کشته شدند.. در پی آن، امامعلی رحمان، رئیس‌جمهور تاجیکستان به نهادهای امنیتی دستور داد که وضعیت و راه‌های تقویت امنیت مرزی را بررسی کنند.

با افزایش ناامنی از خاک افغانستان، امامعلی رحمان، رئیس جمهور تاجیکستان، سوم جدی یک میدان تمرین تانک و چهار پاسگاه جدید را در مرز این کشور و افغانستان افتتاح کرد.