کمیته امنیت ملی تاجیکستان اعلام کرد که چهار شبه‌نظامی وابسته به یک گروه تروریستی هنگام تلاش برای عبور از مرز افغانستان به خاک این کشور کشته شدند. در خبرنامه آمده است این افراد پس از شناسایی، به دستور مرزبانان برای تسلیم‌شدن توجه نکردند و در جریان درگیری کشته شدند.
هویت این افراد اعلام نشده است.
مقام‌های تاجیکستان اعلام کرده‌اند که این افراد از ولسوالی واخان ولایت بدخشان وارد خاک تاجیکستان شده و در ولسوالی شمس‌الدین شاهین شناسایی شده‌اند.
در خبرنامه‌ای که در این‌باره منتشر شده، آمده است که این افراد اقدام به تیراندازی کرده‌اند. تاجیکستان افراد بازداشت‌شده را اعضای یک «سازمان تروریستی» معرفی کرده است.
کمیته امنیت ملی تاجیکستان اعلام کرد که از نزد این افراد سه قبضه تفنگ تهاجمی کلاشینکف، یک قبضه سلاح کمری، مقدار قابل توجهی مهمات، تلفن‌های همراه، یک دستگاه بی‌سیم ارتباطی و تجهیزات دیگر کشف و ضبط شده است.
مقام‌های تاجیکستان گفته‌اند که تحقیقات در زمینه تروریسم، عبور غیرقانونی از مرز و قاچاق سلاح آغاز شده و در حال حاضر وضعیت در مرز تحت کنترول کامل نیروهای تاجیکستان قرار دارد. مقام‌های طالبان تاکنون در مورد این رویداد اظهار نظری نکرده‌اند.
تاجیکستان در ماه جدی سال جاری نیز از وقوع درگیری مسلحانه با شبه‌نظامیانی خبر داده بود که از افغانستان وارد این کشور شده بودند. به گفته مقام‌های تاجیکستان، در آن درگیری سه عضو یک سازمان تروریستی و دو مرزبان تاجیکستان کشته شدند.
در پی چندین حملات، تاجیکستان گفته بود که تکرار چنین رویدادهای مسلحانه نشان می‌دهد اداره طالبان در عمل به تعهدات بین‌المللی برای تامین امنیت و ثبات در مرزهای مشترک با تاجیکستان و مبارزه با گروه‌های تروریستی، به‌گونه‌ای جدی بی‌مسئولیتی کرده است.
