چین از شهروندان خود خواست مناطق مرزی افغانستان و تاجیکستان را ترک کنند
سفارت چین در تاجیکستان روز دوشنبه با اشاره به درگیری تازه در امتداد مرز تاجیکستان و افغانستان، وضعیت امنیتی این منطقه را «به‌شدت وخیم و پیچیده» خواند. این سفارتخانه به شهروندان چینی توصیه کرد که به‌دلیل وضعیت شدید امنیتی از مناطق مرزی افغانستان و تاجیکستان خارج شوند.
کمیته امنیت ملی تاجیکستان روز یکشنبه اعلام کرد که چهار شبه‌نظامی وابسته به یک گروه تروریستی هنگام تلاش برای عبور از مرز افغانستان به خاک این کشور کشته شدند.
در واکنش به این درگیری، سفارت چین در تاجیکستان روز دوشنبه، ۲۹ جدی، از شرکت‌های چینی و شهروندان این کشور در مناطق مرزی خواسته است که وضعیت امنیتی منطقه را از نزدیک دنبال کنند.
این سفارت همچنین از شهروندان چینی خواست که تدابیر امنیتی را بیش از پیش تقویت کنند و هرچه زودتر به‌صورت منظم از مناطق مرزی خارج شوند.
پیش از این، در ۲۶ نوامبر ۲۰۲۵، یک حمله مسلحانه در شهر مرزی شمس‌الدین شاهین در ختلان، در نزدیکی افغانستان، رخ داد که در نتیجه آن سه شهروند چینی کشته و یک تن دیگر زخمی شد.
سفارت چین این حمله را به‌شدت محکوم کرده و آن را یک اقدام جنایت‌کارانه جدی خوانده بود.
سپس در ۳۰ نوامبر سال گذشته، حمله مسلحانه دیگری در همان منطقه رخ داد که آن نیز تلفات شهروندان چینی را در پی داشت و باعث شد سفارت چین هشدار امنیتی صادر کند.
