طالبان تائید کرد که قاچاق مواد مخدر از افغانستان به تاجیکستان همچنان ادامه دارد
ذبیح‌الله مجاهد، سخنگوی طالبان می‌گوید به‌رغم تلاش‌های انجام شده، مواد مخدر همچنان از افغانستان به تاجیکستان قاچاق می‌شود. او گفت چون مرز مشترک افغانستان و تاجیکستان طولانی است، قاچاقچیان «گاهی اوقات سوء استفاده می‌کنند.»
مرزبانی تاجیکستان دهم دلو اعلام کرد که با گروهی از افراد مسلح در مرز افغانستان درگیر شدند. به گفته مقام‌های تاجیکستان، این افراد قاچاقچی بودند و در جریان درگیری سه نفر از آن‌ها کشته شدند.
ذبیح‌الله مجاهد به رادیو-تلویزیون ملی، تحت کنترول طالبان درباره این درگیری گفت اداره طالبان تلاش می‌کند تا مسائل مرزی را حل کند و مانع قاچاق مواد مخدر شود.
او افزود که اداره طالبان و تاجیکستان «هماهنگ هستند» و در آینده از قاچاق جلوگیری خواهد شد.
کمیته امنیت ملی تاجیکستان اعلام کرده در درگیری اخیر در مرز افغانستان، از قاچاقچیان چند اسلحه و چهار کیسه حاوی ۷۳ بسته حشیش و تریاک کشف و ضبط شده است.
