پاکستان مغازه‌ها و بازارهای افغان‌ها را در شهر چمن بسته است
مقامات محلی چمن اعلام کرده‌اند که بر اساس دستور حکومت فدرال پاکستان، مغازه‌ها و بازارهای اداره‌شده از سوی مهاجران افغان، بسته شده است. به گفته مقامات چمن، این کسب‌وکارها به‌طور «غیرقانونی» از سوی مهاجران افغان اداره می‌شد.
در همین‌حال، شماری از مهاجران افغان در چمن از برخورد خشونت‌آمیز پولیس پاکستان شکایت کرده و گفته‌اند که پولیس به آنان اجازه ورود به مغازه‌ها و محل کارشان را نمی‌دهد.
هم‌زمان، پولیس پاکستان عملیات گسترده شناسایی، بازداشت و اخراج مهاجران افغان را در این شهر آغاز کرده است؛ عملیاتی که در آن به گفته منابع تاکنون شمار زیادی از مهاجران افغان بازداشت شده‌اند.
هرچند پاکستان روند اخراج مهاجران افغان در روزهای عید را متوقف کرده بود، اما پیشتر ریاست امور مهاجران و بازگشت‌کنندگان طالبان در ولایت قندهار اعلام کرد که در روزهای عید، ۲۲۲ مهاجر افغان تنها از طریق گذرگاه اسپین بولدک به افغانستان بازگردانده شده‌اند.
