قتل یک زن تاجیکستانی در خجند ۲۵۰ خانواده افغان را با خطر اخراج روبه‌رو کرده است
شماری از افغان‌های مقیم تاجیکستان می‌گویند پس از بازداشت یک شهروند افغان به اتهام قتل یک زن در خجند، حدود ۲۵۰ خانواده افغان به کمپی در دوشنبه منتقل شده‌اند و با خطر اخراج روبه‌رو هستند.
وزارت داخله تاجیکستان می‌گوید یک شهروند ۲۲ ساله افغانستان، به اتهام قتل وحیدووا عزیزه دونیاربیکوونا، زن ۲۷ ساله تاجیکستانی بازداشت شده است.
به گفته این وزارت، این شهروند افغان به‌گونه غیرقانونی در روستای دهنموی ولسوالی جبار رسولوف زندگی می‌کرد و این زن را با چاقوی آشپزخانه کشته است. وزارت داخله تاجیکستان گفته است که برای او پرونده جنایی باز شده و اکنون در بازداشت موقت به سر می‌برد.
شماری از افغان‌ها در شهرهای خجند و دوشنبه به افغانستان اینترنشنال گفتند که پس از این رویداد، اداره خجند حدود ۲۵۰ خانواده افغان را به یک کمپ در دوشنبه منتقل کرده است. به گفته آنان، احتمال دارد به افغانستان اخراج شوند.
منابع در دوشنبه می‌گویند بسیاری از این خانواده‌ها به دلیل مشکلات سیاسی با طالبان و ترس از انتقام‌جویی به تاجیکستان پناه برده‌اند.
