تاجیکستان می‌گوید شهروندان افغان را به‌دلیل «نقض جدی قوانین» اخراج کرده است
کمیته امنیت ملی تاجیکستان گفت که برخی مهاجران افغان به‌رغم داشتن «اقامت، کار، تحصیل و آرامش، به‌طور جدی قوانین این کشور را نقض کرده‌اند.»
کمیته امنیت ملی تاجیکستان گفت که برخی مهاجران افغان به‌رغم داشتن «اقامت، کار، تحصیل و آرامش، به‌طور جدی قوانین این کشور را نقض کرده‌اند.»
بنا به ادعای این نهاد، آنان به‌دلیل «قاچاق مواد مخدر، عضویت در گروه‌های تروریستی، تعرض جنسی به کودکان، ایجاد مراکز قمار و جعل اسناد» اخراج شده‌اند.
کمیته دولتی امنیت ملی تاجیکستان روز یکشنبه در پاسخ به درخواست محمد حکیم تورسن، نامزد پیشین انتخابات ریاست جمهوری افغانستان، درباره علت اخراج شماری از شهروندان افغان از این کشور، توضیحات ارائه کرد.
خاور، خبرگزاری دولتی تاجیکستان، با نشر این بیانیه گزارش داده است که مقام‌های تاجیکستان تاکید کرده‌اند در حال حاضر ده‌ها هزار شهروند افغانستان در این کشور به‌صورت قانونی زندگی و کار می‌کنند و برای آنان شرایط مناسب اقامت و اشتغال فراهم است.
با این حال، این سازمان امنیتی گفته است که برخی افراد به دلیل ارتکاب «جرایم سنگین» بازداشت و از کشور اخراج شده‌اند.
در این بیانیه به آمارهایی از جمله ۶۷۰ مورد قاچاق مواد مخدر، ۳۲ مورد عضویت در گروه‌های تروریستی، ۱۵ مورد جرایم خشونت‌آمیز جنسی علیه کودکان، ۵۹۴ مورد استفاده از اسناد جعلی برای دریافت پناهندگی و ۴۵ مورد مرتبط با ایجاد مراکز قمار اشاره شده که از سوی شهروندان افغان در تاجیکستان انجام شده است.
این نهاد امنیتی تاکید کرده است که «چنین اعمال جنایت‌کارانه و رفتارهای تهدیدآمیز، امنیت کشور را به‌طور مستقیم به خطر می‌اندازد.»
در ۱۵ ثور سال جاری، منابع به افغانستان اینترنشنال گفته بودند که تاجیکستان ۲۵۰ خانواده مهاجر افغان را اخراج کرده است. به گفته پناهجویان، آنان فرصت کافی برای جمع‌آوری وسایل و دارایی‌های خود نداشته و بخشی از اموال‌شان در این کشور باقی مانده است.
