جنرال مایکل کوریلا، فرمانده سنتکام در دیدار با مقامات تاجیکستان بر تامین امنیت مرز این کشور با افغانستان تاکید کرد. فرماندهی مرکزی امریکا میگوید که آماده است نیروهای امنیتی تاجیکستان را برای دفاع از مرزهای آن کشور آموزش دهد و تجهیز کند.
آقای کوریلا در سفر دو روزهاش به دوشنبه، با رئیسجمهور و مقامات ارشد امنیتی تاجیکستان درباره «مسائل مهم امنیتی» از جمله بهبود امنیت مرزهای این کشور گفتگو کرد.
جنرال کوریلا امنیت مرزهای تاجیکستان را حیاتی خواند و گفت: «مرزهای قوی تاجیکستان برای امنیت کل آسیای مرکزی حیاتی است.»
به نقل از اعلامیه سنتکام، آقای کوریلا همچنین تصریح کرد که همکاری امنیتی با نیروهای امنیتی تاجیکستان بر مبارزه با تروریزم و عملیاتهای امنیتی مرزی متمرکز است.
حمایت سنکام از تاجیکستان شامل نصب حسگرهای زمینی، تجهیزات مخابراتی و وسایط گزمه برای مرزبانان تاجیکستان میشود.
جنرال کوریلا تاکید کرد که نیروهای ویژه امریکا در ۲۰ سال گذشته تجربه وسیعی در مبارزه با تروریزم به دست آوردند و میتوانند این تجربه را با نیروهای مسلح تاجیکستان شریک سازند.
جنرال کوریلا به مقامات تاجیک اطمینان داد که کمک به تاجیکستان ادامه خواهد داشت. او گفت: «من به حاکمیت ملی و تمامیت ارضی تاجیکستان متعهد هستم.»
تاجیکستان همواره نگران امنیت مرزهایش با افغانستان بوده است. پیش از این امامعلی رحمان، رئیسجمهور این کشور در نشست سازمان پیمان امنیت جمعی در مسکو از تهدیدهای احتمالی افغانستان هشدار داده بود.
او اواسط ماه می در نشست مذکور گفت: «برای کشورهای عضو سازمان پیمان امنیت جمعی مهم است که تلاشها برای حفاظت از مرزهای خارجی را افزایش دهند.»
